Շատ մեծ մարդկային կորուստներ ենք ունեցել միայն երեկ վերջին մի քանի ժամերի ընթացքում Մարտունու շրջանում և բոլորն անօդաչուներով. Արայիկ Հարությունյան
Շատ մեծ մարդկային կորուստներ ենք ունեցել միայն երեկ վերջին մի քանի ժամերի ընթացքում Մարտունու շրջանում և բոլորն անօդաչուներով. ինչո՞ւ չհաջողվեց, մենք բոլորս պատասխան ենք տալու, քանի որ մենք գիտեինք, որ ՊԲ-ն ուներ այդ խնդիրը, պատասխանատու ենք բոլորս, ովքեր զբաղեցրել էին պաշտոններ վերջին տասնամյակներում: Այս մասին ֆեյսբուքյան ուղիղ եթերում ասաց Արցախի Հանրապետության նախագահ Արայիկ Հարությունյանը:
Նրա խոսքով՝ բարոյահոգեբանաական վիճակը զորքի շատ լավ չէր, ինչ-որ տեղ ծայրահեղ վատ էր. «Զորքը հիվանդ էր թութքով, դիզինտերիայով, քովիդով. հյուծված վիճակում 43 օր գտնվում էր առաջագծում, չունեինք հնարավորություն փոխելու, հանգստանալու, բուժելու: Ամեն օր մարտական գործողությունների մեջ. ամեն օր զոհեր, վիրավորներ: Այդ ամենով կարողանում էինք դիմադրել ինչ-որ տեղ 8 պետության զինված ուժերին: Հաստատ մենք Ադրբեջանի դեմ չենք միայն կռվել, միայն թուրքական անձնակազմը կամ զինտեխնիկան չի եղել մարտադաշտում և մարտական գործողությունների ընթացքում: Ունենք փաստեր, գերիներ: Կռվում էր հայ կամավորը, հայ զինվորը. ես խոնարհվում եմ մեր զինվորների առջև, աշխարհի ամենահերոս տղեքն են եղել մեր զինվորենրը»,- շեշտեց ԱՀ նախագահը:
Նա նշեց, որ, իհարկե, կարող ենք ասել՝ ինչու ժամանակին տեղեկացված չէինք այդ վիճակից, և հավելեց, որ ինքը կոչ է արել Աղդամից՝ հիշեցնելով, որ մարդկանց կարիքը կա, ապա Շուշիից է ասել, որ Շուշին վտանգված է: «Վիճում էին Շուշին մեր ձեռն է, թե չէ, բայց մենք Շուշիի վերահսկողությունը կորցրել էինք նոյեմբերի 5-ից, իսկ ամբողջությամբ՝ նոյեմբերի 7-ից: Չէինք ուզում հավատալ, որ կորցնում ենք հայրենիքն ամբողջությամբ, չէինք ուզում հավատալ, որ անհնարին էր կռվել այն եղած ռեսուրսերով մարդկային ու զինտեխնիկայի, որ կար»,- ասաց Արայիկ Հարությունյանը:
