Հայկական կողմն Ադրբեջանի կողմից F-16-երի կիրառության ապացույցներ ունի. Արծրուն Հովհաննիսյան
Երեկ ամերիկյան բլոգներից մեկը հրապարակեց լուսանկար, որում երևում էին Ադրբեջանի օդանավակայանում կանգնած F-16-երը: Այդ մասին ճեպազրույցի ժամանակ ասաց ՊՆ ներկայացուցիչ Արծրուն Հովհաննիսյանը՝ հավելելով, որ հայկական կողմը նույնպես ապացույցներ ունի, թե ինչպես է հակառակորդը կիրառում դրանք:
Ինչ վերաբերում է ադրբեջանական ղեկավարության սպառնալիքներին, Հովհաննիսյանն ասաց, որ ՊԲ ստորաբաժանումները չեն վախենում այդ սպառնալիքներից, քանի որ դրանց ականատես են արդեն մեկ ամիս:
«Արցախի ռազմական ղեկավարությունը տիրապետում է իրավիճակին, հետևում ենք Ադրբեջանի գործողություններին, քայլերին և որոշ տեղերում ստիպված ենք լինում զիջել դիրքերը, քանի որ հակառակորդի ուժերը մի քանի անգամ ավելի շատ են, և դա արվում է զոհերից խուսափելու համար: Սակայն վստահեցնում եմ, որ մեր գեներալները, սպաները քաջ են և մշտապես կանգնած են զինվորի կողքին»,- ասաց Հովհաննիսյանը:
Անդրադառնալով հայկական արտադրության ԱԹՍ-ներին՝ ՊՆ ներկայացուցիչը նշեց, որ դրանց կիրառությունը, ցավոք մեծ չէ, բայց դրանք ունեն իրենց դերակատարությունը: «Հայկական միտքն այդ ուղղությամբ շարունակում է աշխատել»,- ասաց նա:
Իսկ զորահավաքը, ըստ Հովհաննիսյանի, ընթանում է բնականոն հունով, կամավորներն անցնում են մարտական պատրաստություն և մեկնում առաջնագիծ:
