Թուրքական ապրանքների բոյկոտն ընդլայնվում է մերձարևելյան երկրներում

Սաուդյան Արաբիայի և Թուրքիայի միջև առկա վեճն ընդլայնվում է: Այս մասին գրել է  «Ռեգնում» գործակալությունը: Էր-Ռիյադից հետո Արաբական Միացյալ էմիրությունները, Մարոկկոն և Ալժիրը նմանատիպ քայլեր են ձեռնարկել և բարձրացրել են թուրքական ապրանքների հարկերը, փոխանցում է ը:

Թուրքական ապրանքները մնում են սահմանային պահեստներում, իսկ սպառողներին կոչ են անում չգնել դրանք: Հարկ է նշել, որ ոչ պաշտոնական էմբարգոյին մասնակցում են առաջատար ընկերություններ:

«Սաուդյան Արաբիայում հիմնված Abdullah Al-Othaim Markets ընկերությունը, որը Մերձավոր Արևելքում 3 հիմնական առևտրային ցանցերից մեկն է, հայտարարել է, որ չի գնի թուրքական արտադրության ապրանք քաղաքական պատճառներով»,- գրում է World Newspaper թերթի լրագրող Քերիմ Ուլկերը:

Նրա խոսքով՝ հայտարարվել է, որ տեղի մատակարարողները կդադարեցնեն թուրքական ապրանքների վաճառքը Սաուդյան Արաբիայում և Եգիպտոսում:

Ավելի վաղ հաղորդվել էր, որ Սաուդյան Արաբիայում շարունակում է թափ առնել թուրքական ապրանքների ներկրման բոյկոտը: Տեղական սուպերմարկետների ցանցներն այս շաբաթ միացել են բոյկոտին:

Հայտնի է, որ բոյկոտը հիմնված է երեք «ոչ»-երի վրա՝ ո՛չ ներդրումներին, ո՛չ ներմուծմանը, ո՛չ տուրիզմին:

Ավելի վաղ Սաուդյան Արաբիայի արքայազն Աբդուլռահման բին Մուսաադը կոչ էր արել բոյկոտել թուրքական ապրանքների ներմուծումն արաբական ամենամեծ միապետություն այն բանից հետո, երբ Թուրքիայի նախագահ Ռեջեփ Թայիփ Էրդողանը հայտարարել է, որ Կատարում թուրքական բանակը նպաստում է Պարսից ծոցի երկրներում իրավիճակի կայունացմանը:

Սաուդյան Արաբիայի առևտրային պալատի ղեկավար Աջլան ալ Աջլանը, իր հերթին, թվիթերյան էջում գրել էր. «Բոյկոտեք թուրքական ամեն բան՝ ներմուծում, արտահանում, ներդրում ու զբոսաշրջություն: Այժմ սա յուրաքանչյուր սաուդցի գործարարի և սպառողի պարտականությունն է»,- գրել է նա:

Ալ Աջլանի խոսքով՝ Թուրքիային բոյկոտելու կոչերը Սաուդյան Արաբիայի, նրա առաջնորդների և քաղաքացիների նկատմամբ թուրքական կառավարության թշնամական վերաբերմունքի պատասխանն են: