Արցախցի կանայք հանդիպել են ԱՄՆ դեսպանատան դիվանագիտական բաժնի պետին և բաց նամակ հանձնել
Երևանում ժամանակավորապես ապրող արցախցի կանայք իրենց երեխաների հետ բողոքի ակցիա են իրականացնում ՀՀ-ում ԱՄՆ դեսպանատան դիմաց և հանդիպում պահանջում դեսպան Լին Թրեյսիի հետ:
Ակցիայի մասնակիցներն ի վերջո հանդիպել են ԱՄՆ դեսպանատան դիվանագիտական բաժնի պետի հետ:
«Արմենպրեսի» հաղորդմամբ՝ կանայք, որոնք միջազգային հանրությունից պահանջում են համարժեք արձագանք Արցախում թուրք-ադրբեջանաահաբեկչական ագրեսիային, դեսպանատան ներկայացուցչին են ներկայացրել նամակի տեսքով ձևակերպված իրենց պահանջը:
Դուրս գալով դեսպանատնից՝ ակցիայի մասնակիցներից մեկը՝ Լիանա Ադամյանը նշել է, որ իրենք հանդիպում են պահանջել դեսպան Լին Թրեյսիի հետ:
«Մենք հանձնեցինք նամակի տեսքով ձևակերպված մեր պահանջը և ասացինք, որ պատասխանը պետք է շատ արագ լինի, այլապես հնարավոր է, որ դիմենք ծայրահեղ քայլերի: Անհրաժեշտության դեպքում վրաններ կդնենք ու կապրենք այստեղ: Մենք չունենք ուրիշ հայրենիք, ուրիշ բնակավայր չունենք»,- ասաց Ադամյանը և հավելեց, որ իրենք պահանջել են, որպեսզի ԱՄՆ-ը միայն հայտարարություն անելով հանդես չգա:
Լիանա Ադամյանն ասել է, որ դեսպանատան դիվանագիտական բաժնի պետն իրենց պատասխանել է, որ կփորձի հանդիպում կազմակերպել դեսպանի հետ:
Արցախցի կանանց ձեռքերում պաստառներ են, որոնց վրա տարբեր գրառումներ են, ինչպես օրինակ. «Մենք պահանջում ենք պատժամիջոցներ կիրառել Թուրքիայի և Ադրբեջանի նկատմամբ», «Դադարեցրեք ահաբեկչությունը», «Ինչո՞ւ է ՆԱՏՕ-ի անդամը սպանում մեզ» և այլն:
Կանայք նաև վանկարկում էին «Մենք խաղաղություն ենք ուզում», «Կույր մի՛ եղեք», «Մի լռեք», «Կանգնեցրե՛ք Էրդողանին», «Ճանաչե՛ք Արցախը» և այլն: