Պետդումայում հայտարարել են Լեռնային Ղարաբաղում Ռուսաստանի դեսանտային գործողության հնարավորության մասին. «ՌԻԱ Նովոստի»
Պետդումայի ԱՊՀ գործերով եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը Ազգային լրատվական ծառայությանը տված հարցազրույցում չի բացառել, որ Լեռնային Ղարաբաղում տիրող իրավիճակին Ռուսաստանի արձագանքի տարբերակներից մեկը կարող է լինել դեսանտների ներգավվումը:
Պատգամավորի խոսքով՝ տարածաշրջանում խաղաղությունը խախտել են Ադրբեջանն ու Թուրքիան, ուստի պետք է հիշեցնել, թե որ պետությունն է հետխորհրդային տարածքում մնում առաջատարը: Միևնույն ժամանակ, նա խոստովանել է, որ վստահ չէ, թե ինչպես պետք է գործի Մոսկվան, բայց նա հնարավոր տարբերակների շարքում անվանել է դեսանտայինի գործողությունը:
«Հայաստանի ռազմական ներուժի ցուցադրական ամրապնդման տեսքով: ՀԱՊԿ-ին դիմելու ձևով` դեսանտային գործողության միջոցով հայկական, ոչ թե Լեռնային Ղարաբաղի, այլ հայկական տարածքը պաշտպանելու համար միջոցներ ձեռնարկելու անհրաժեշտության պատճառով: Օդային շրջափակումը բացելով»,- հնարավոր տարբերակներն է թվարկել Զատուլինը:
Նա ավելացրել է, որ անհրաժեշտության դեպքում Ռուսաստանը պետք է Վրաստանին բացատրի, որ «անհրաժեշտ օդային տարածքով Հայաստան կուղարկվեն անհրաժեշտ ուժեր և միջոցներ»:
«Քանի որ մենք խոսում ենք Կովկասում գորհայինների ներխուժման մասին, ինչից կտուժեն Ռուսաստանը, Վրաստանը և մնացած բոլորը: Կա սպառնալիք հայ բնակչության մեծ զանգվածի համար, որը պատմականորեն հիշում է այս տարածաշրջանում տեղի ունեցած ցեղասպանությունը: Մենք պետք է միջոցներ ձեռնարկենք», – նշել է նա:
Բացի դրանից, Զատուլինը համաձայնել է Հայաստանի վարչապետ Նիկոլ Փաշինյանի կարծիքի հետ, ով հայտարարել է, որ Ադրբեջանի գործողությունների պատճառով հակամարտությունը դեռ չունի դիվանագիտական լուծում, ինչպես նաև ափսոսանք հայտնեց, որ բանակցային գործընթացը իրականում չի շարժվում, չնայած Ռուսաստանի բոլոր ջանքերին:
«Ուստի մենք կարող ենք մասամբ հաստատել այն, ինչ ասաց Փաշինյանը: Հիմա մենք տեսնում ենք, որ ադրբեջանական կողմը փոխում է իր դիրքերը և կողմ է բանակցություններին: Միևնույն ժամանակ, շարունակելով հարձակումը և կուլիսներում անընդունելի պահանջներ առաջադրելով: Բայց արտաքուստ դա խաղաղասիրական տպավորություն է թողնում», – կարծում է Զատուլինը:
Սեպտեմբերի 27-ին Ադրբեջանը, խախտելով բոլոր միջազգային պարտավորվածությունները, թուրքական բանակի և Մերձավոր Արևելքից բերված ահաբեկիչների անմիջական մասնակցությամբ հարձակում է սկսել Արցախի ուղղությամբ՝ թիրախավորելով նաև խաղաղ բնակչությանը: Այդ ընթացքում բազմիցս հրետակոծվել են թե՛ Արցախի և թե՛ Հայաստանի բնակավայրերը, խաղաղ բնակչության շրջանում կան բազմաթիվ զոհեր ու վիրավորներ, ավերվել են տասնյակ շինություններ, ահռելի վնաս է հասցվել քաղաքացիական ենթակառուցվածքներին։
Հայկական Զինված ուժերը հերոսական ու համառ մարտեր են մղում հակառակորդի դեմ՝ պատճառելով նրան կենդանի ուժի և տեխնիկայի ծանրագույն կորուստներ։
Հայտնաբերվել են Թուրքիայի ներգրավվածության, Սիրիայից վարձկանների տեղափոխման և Արցախի դեմ օգտագործման փաստեր:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը շարունակում է լայնածավալ մարտական գործողությունները Արցախի դեմ, իրականացրել է դիվերսիոն գործողություններ, հրթիռակոծել խաղաղ բնակավայրեր Հայաստանում և Արցախում, այդ թվում մշակութային օջախներ, դպրոցներ, նաև քաղաքացիական հիվանդանոց։