Ղրղզստանում ձերբակալել են սիրիացի ահաբեկիչների հետ կապված զինյալների. ՏԱՍՍ
Ղրղզստանի ազգային անվտանգության պետական կոմիտեի աշխատակիցները ձերբակալել են միջազգային ահաբեկչական կազմակերպություններից մեկի անդամներին, որոնք կապված են սիրիացի գրոհայինների հետ: ՏԱՍՍ գործակալության տեղեկացմամբ, այս մասին հոկտեմբերի 20-ին հայտարարել է կառույցի մամուլի կենտրոնը:
«Ազգային անվտանգության պետական կոմիտեն միջազգային ահաբեկչական կազմակերպությունների գաղտնի կառույցների և դրանց ֆինանսավորման ուղիների հայտնաբերման օպերատիվ-որոնողական միջոցառումների ընթացքում ՆԳՆ-ի հետ համատեղ Ջալալ Աբադ քաղաքում ձերբակալել են հանրապետության երկու քաղաքացու», – գրված է կոմիտեի հայտարարության մեջ:
Ձերբակալված զինյալների անուն-ազգանունները չեն հրապարակվել, բայց հայտնի է, որ նրանք հոկտեմբերի 19-ին հարձակվել են տեղացի գործարարի վրա և նրանից խլել մոտ 5000 ԱՄՆ դոլար: Ներկայում կասկածյալները գտնվում են Ջալալ Աբադ քաղաքի ՆԳ վարչության ժամանակավոր պահման մեկուսարանում:
«Ձերբակալվածները կասկածվում են Սիրիայում անօրինական զինված խմբավորումների գործողություններին մասնակցելու մեջ: Նրանց ղեկավարների հանձնարարությամբ նրանք ժամանել են հանրապետություն՝ ավազակային հարձակումներ կազմակերպելու և միջազգային ահաբեկչական կազմակերպություններին ֆինանսական աջակցություն ցուցաբերելու համար», -հայտնել են Ազգային անվտանգության պետական կոմիտեից:
