Այսօրվա մարդիկ սովորաբար չունեն կրեդո. փոխարենը ունեն սմարթֆոններ

Իկարկե, այս գրառումը քչերը կկարդան, բայց եթե շատ անկեղծ լինեմ, այն երևի ավելի շատ ինձ համար է, քան ընթերցողների, և երևի ավելի շատ նպատակ ունի «դուրս հանելով» ձերբազատվել ներքին մի «դիալոգից», քան ինչ-որ միտք կամ գաղափար տարածել մարդկանց մեջ։

Խոսքը վերաբերում է «Հավատոյ հանգանակին», այն բանաձևին, որն արտահայտում է եկեղեցու դավանանքի բուն էությունը, և որն ընդունելով է անձն իրավունք վաստակում ինքն իրեն համարել տվյալ եկեղեցու անդամ։

Մեր եկեղեցին շուրջ 1600 տարի յուրաքանչյուր Սուրբ Պատարագի ընթացքում վերահաստատում է իր «Հավատոյ Հանգանակը» – «Հավատում ենք մեկ Աստծո՝ ամենակալ Հորը, երկնքի և երկրի, երևելիների և աներևույթների Արարչին։ Եվ մեկ Տիրոջ՝ Հիսուս Քրիստոսին, Աստծո Որդուն, ծնված Հայր Աստծուց Միածին, այսինքն՝ Հոր էությունից։ Աստված՝ Աստծուց, լույս՝ լույսից, ճշմարիտ Աստված՝ ճշմարիտ Աստծուց, ծնունդ և ոչ թե՝ արարած…» և այլն։ Եվս 11 նախադասություն։

Շուրջ 1600 տարի մեր եկեղեցին քարոզել է, որ (1) կա հավերժական ճշմարտություն և (2) այդ հավերժական ճշմարտությունը այ սա՛ է։

Ու այն մարդիկ, որ այս քարոզը դարեր ի վեր լսել են, ստացել են ուղերձ այն մասին, որ հավերժական ճշմարտություն կա՛։ Ու ոչ միայն դավանանքում, այլև բարոյականության տիրույթում, հանրային կյանքում, ամենուր։ Այս ուղերձն է պարունակել «Հավատոյ հանգանակը» կամ նույնն է թե՝ «Կրեդո»-ն։ Մարդը պետք է ինքնասահմանվի ինչ-որ հավատամքով։

Իսկ ժամանակակից «եկեղեցի այցելողների» ծանրակշիռ մասը իր հավատքը սահմանում է ձայնի խորիմաստ արտահայտությամբ պնդելով, որ ինքը հավատում է Աստծուն, և որ իր ու Աստծո միջև կա կապ՝ անկախ եկեղեցուց ու հոգևորականներից։ Այսինքն՝ աշխարհ առանց «հավերժական ճշմարտությունների»։

Այստեղից էլ՝ ճկունության գերակայությունը ճշմարտության նկատմամբ։ Այստեղից էլ՝ ճշմարտություններին «զինվորագրվելու» ոչ-մոդայիկ լինելը։

Միշտ հարգել եմ ինչ-որ ճշմարտությունների խորապես հավատացող մարդկանց՝ անկախ իմ վերաբերմունքից կոնկրետ այդ կրեդոյի նկատմամբ։ Ու միշտ տանել չեմ կարողացել կրեդո չունեցող մարդկանց։

Ունենալ կրեդո․ երևի սա եղել է մարդուն սահմանող հատկանիշներից մեկը։ Մինչդեռ այսօրվա մարդիկ սովորաբար չունեն կրեդո։ Փոխարենը ունեն սմարթֆոններ։

Ռուբեն Մելիքյանի ֆեյսբուքյան էջից