Տողի մելիքական ապարանքի տարածքում կազմակերպվել է «Գուպար» ազգային-ավանդական խաղերի մրցույթ
Հադրութի շրջվարչակազմի աշխատակազմի մշակույթի և երիտասարդության հարցերի բաժնի նախաձեռնությամբ Տողի մելիքական ապարանքի տարածքում կազմակերպվել է «Գուպար» ազգային-ավանդական խաղերի մրցույթ՝ նվիրված ԱՀ հռչակման 29-րդ տարեդարձին:
«Արցախպրեսի» թղթակցի հետ զրույցում ասել է Հադրութի շրջվարչակազմի աշխատակազմի մշակույթի և երիտասարդության հարցերի բաժնի վարիչ Երազիկ Հայրիյանը:
Նրա խոսքով, հաշվի առնելով Պարետի որոշումները, մրցույթին մասնակցել են Հադրութի շրջանի միայն վեց համայնքների 18-25 տարեկան երիտասարդներ: Մրցույթի հանձնախմբում ընդգրկված էին տարբեր գերատեսչությունների ներկայացուցիչներ:
«Մրցույթի նպատակն է նոր շունչ հաղորդել ազգային-ավանդական խաղերին, որոնք կարծես թե, մոռացության են մատնվել այսօրվա սերնդի կողմից: Այդ խաղերը ոչ միայն երիտասարդներին զբաղեցնելու, այլև նրանց կրթելու միջոց են: Ազգային-ավանդական խաղերը դեռ մանկուց ազդել են երեխաների ոչ միայն ֆիզիկական կարողությունների զարգացմանն ու կոփմանը, այլև օգնել են երեխաների մեջ զարգացնել հնարամտություն և մրցակցության գաղափար»,- նշել է Ե. Հայրիյանը:
Մրցույթում հաղթող է ճանաչվել Այգեստան համայնքը: Հադրութի շրջվարչակազմի աշխատակազմի մշակույթի և երիտասարդության հարցերի բաժնի կողմից հաղթողներն արժանացել են պատվոգրերի:
Ե. Հայրիյանը շնորհակալություն է հայտնել միջոցառման աջակիցներին՝ Հադրութի շրջվարչակազմի ղեկավարությանը, «Արարիչ» և «Արարատ» բարեգործական հիմնադրամներին, ինչպես նաև շրջկենտրոնի մանկապատանեկան մարզադպրոցի աշխատակիցներին:
