Պուտինը և Լուկաշենկոն կհանդիպեն Մոսկվայում
Վլադիմիր Պուտինի և Բելառուսի նախագահ Ալեքսանդր Լուկաշենկոյի հանդիպումը տեղի կունենա առաջիկա մի քանի շաբաթվա ընթացքում Մոսկվայում։ Այս մասին հայտարարել է Ռուսաստանի արտգործնախարար Սերգեյ Լավրովը:
«Սա ընդգծում է մեր փոխադարձ տրամադրվածությունը` հետագայում զարգացնելու հավասար, փոխշահավետ հարաբերություններ, այդ թվում`Միութենական պետության շրջանակներում», – նշել է նախարարը:
Այսօր Մոսկվայում բանակցություններ են ընթանում Լավրովի ու նրա բելառուս գործընկեր Վլադիմիր Մակեյի միջև: Սա Մակեյի առաջին այցն է Ռուսաստան՝ Բելառուսում նախագահական ընտրություններից հետո, որի արդյունքները բողոքի զանգվածային ակցիաներ են առաջացրել:
Ռուսաստանի նախագահին առընթեր ազգամիջյան հարաբերությունների խորհրդի անդամ Բոգդան Բեզպալկոն նշել է, որ արտգործնախարարները, ամենայն հավանականությամբ, կքննարկեն Ալեքսանդր Լուկաշենկոյի Ռուսաստանի մայրաքաղաք ժամանման նախապատրաստական աշխատանքները: Այցի ստույգ ամսաթիվը դեռ չի համաձայնեցվել:
Բացի դրանից, հինգշաբթի օրը Մինսկ կայցելի Ռուսաստանի վարչապետ Միխայիլ Միշուստինը: