Ադրբեջանի նախկին արտգործնախարար Էլմար Մամեդյարովին արգելել են լքել երկիրը
Ադրբեջանի նախկին արտգործնախարար Էլմար Մամեդյարովին արգելվել է լքել երկիրը: Պատճառը Ադրբեջանի արտաքին գործերի նախարարությունում հակակոռուպցիոն գործողության հետ կապված քրեական գործի հարուցումն է, գրում է Gununsesi.info-ն:
«Էլմար Մամեդյարովը պետք է պատասխանի քննության բազմաթիվ հարցերի»,- ասել է գործակալության զրուցակիցը:
Մամեդյարովն ազատվել է Ադրբեջանի արտգործնախարարի պաշտոնից անցած ամիս: Համապատասխան հրամանագիրը ստորագրել էր Ադրբեջանի նախագահ Իլհամ Ալիևը:
Ադրբեջանի նախագահի մեկ այլ հրամանագրով՝ Ջեյհուն Բայրամովը նշանակվել է արտգործնախարարի պաշտոնում:
Ադրբեջանի նախագահ Իլհամ Ալիևը դժգոհություն էր հայտնել երկրի արտգործնախարար Էլմար Մամեդյարովի աշխատանքից: Նա ընդգծել էր, որ նախարարը պետք է Հայաստանի հետ պայմանավորվեր Ղարաբաղյան հակամարտության վերաբերյալ, բայց, ցավոք, մինչ այժմ նպատակին չի հասել, քանի որ Հայաստանը դեռ չի կատարել ՄԱԿ-ի Անվտանգության խորհրդի բանաձևը:
