«Հայ-ադրբեջանական սահմանին պայքարը սրվում է». Associated Press
Ամերիկյան «Ասոշիեյթիդ Պրես» պարբերականն անդրադարձել է հայ-ադրբեջանական սահմանին տիրող լարված իրավիճակին՝ ներկայացնելով Երևանում իր թղթակցի հոդվածը, որում նշվում է, որ ծանր հրետանու և անօդաչու թռչող սարքերի կիրառմամբ զինված բախումների հետևանքով առնվազն 16 մարդ է մահացել երկու կողմից:
«Փոխհրաձգությունը երկու հարավկովկասյան երկրների միջև սկսվել է կիրակի: Ադրբեջանը հայտնել է, որ 11 զինծառայող և մեկ քաղաքացիական անձ է կորցրել, Հայաստանը հայտնել է 4 զինվորականի մահվան մասին»,-ասվում է հոդվածում:
Նշվում է, որ վերջին օրերին տեղի ունեցող բախումներն ամենալուրջն են 2016թ․ քառօրյա մարտերից հետո: Շեշտվում է, որ Ադրբեջանի պաշտպանության նախարարությունը երկու բարձրաստիճան սպայի է կորցրել, ինչպես նաև 5 այլ զինվորականների:
Հոդվածում մեջբերվում է ՀՀ ՊՆ խոսնակ Շուշան Ստեփանյանի խոսքն այն մասին, որ ադրբեջանցի զինվորականները քաղաքացիական անձանց օգտագործում են որպես վահան՝ հրետանի տեղակայելով սահմանից 10 կմ հեռավորությամբ գտնվող Դոնդար Ղուշչու գյուղի մոտակայքում:
«Ադրբեջանական կողմն իր սեփական ժողովրդին շրջափակել է հրետանային մարտկոցներով՝ վերջիններիս վերածելով թիրախի, այնուհետև բողոքում է, որ հայկական կողմը կրակ է բացել նրանց ուղղությամբ»,- հոդվածում մեջբերվում է Շուշան Ստեփանյանի հայտարարությունը:
Նշվում է նաև, որ Ադրբեջանի հետ սերտ էթնիկ և մշակութային կապեր ունեցող Թուրքիան աջակցություն է հայտնել Բաքվին հակամարտության հարցում: