ՄԱԿ-ի Անվտանգության խորհուրդը չի ընդունել Սիրիա մարդասիրական օգնություն տրամադրելու վերաբերյալ բանաձևի ռուսական տարբերակը
Անվտանգության խորհուրդը չի ընդունել Ռուսաստանի կողմից առաջարկված՝ Թուրքիայի հետ սահմանին մեկ հսկիչ անցակետով Սիրիա հումանիտար օգնության առաքման վերաբերյալ բանաձևի նախագիծը: Այս մասին չորեքշաբթի հաղորդել է կազմակերպությունում ՏԱՍՍ-ի աղբյուրը:
«Յոթ երկիր դեմ է քվեարկել բանաձևին, չորսը աջակցել է փաստաթղթին, ևս չորսը ձեռնպահ է մնացել: Այսպիսով, փաստաթուղթը չի ընդունվել», -հայտարարել է ՄԱԿ-ում Գերմանիայի մշտական ներկայացուցիչ Քրիստոֆ Հուսգենը՝ որպես հուլիսին Անվտանգության խորհրդի նախագահ:
Ինչպես հայտնի դարձավ ՏԱՍՍ-ին, Ռուսաստանը, Չինաստանը, Վիետնամը և Հարավային Աֆրիկան քվեարկել են Ռուսաստանի Դաշնության առաջարկած տեքստի օգտին: Ձեռնպահ են եղել Ինդոնեզիան, Նիգերը, Սենտ Վինսենթը և Գրենադինների ու Թունիսը: Դեմ են քվեարկել Մեծ Բրիտանիան, ԱՄՆ-ը, Ֆրանսիան, Բելգիան, Գերմանիան, Դոմինիկյան Հանրապետությունը և Էստոնիան:
Քվեարկությունը տեղի է ունեցել գրավոր` կորոնավիրուսի տարածման դեմ պայքարելու համար ՄԱԿ-ի կենտրոնակայանում կիրառված սահմանափակումների պատճառով: Ռուսաստանը առաջարկել էր վեց ամսով երկարաձգել Սիրիայի տուժած տարածքներին մարդասիրական օգնության առաքման մեխանիզմը՝ միաժամանակ սահմանափակելով գործող անցակետերի քանակը, թողնելով մեկ՝ «Բաբ Ալ Խավա» անցակետը (Թուրքիայի հետ սահմանին): Հուլիսի 7-ին Ռուսաստանը և Չինաստանը վետո դրեցին Գերմանիայի և Բելգիայի որոշման նախագծին, որով առաջարկվում էր երկու անցակետեր բաց թողնել ՄԱԿ-ի համար:
