Վրաստանը ե՞րբ է մտադիր բացել Ռուսաստանի հետ սահմանը
Վրաստանի իշխանությունները արդեն որոշել են, որ կարող են բացել Ռուսաստանի հետ սահմանի Վերին Լարս անցակետը։ Այս մասին հայտնել է Վրաստանի վարչապետի՝ Ռուսաստանի հետ հարաբերությունների կարգավորման հարցով հատուկ դեսպան Զուրաբ Աբաշիձեն, փոխանցում է «Գազետա.ռու»-ն։
«Սահմանի բացումը կախված է համաճարակաբանական իրավիճակից։ Լավ կլիներ, եթե հաջողվեր Ռուսաստանի հետ սահմանը բացել օգոստոսին՝ ամռան վերջին»,- ասել է պաշտոնյան։
Այդ անցակետը ռուս-վրացական սահմանին գործող միակ անցակետն է։ Դրանով է իրականացվում նաև Ռուսաստան-Հայաստան ապրանքաշրջանառության զգալի մասը, և անցակետի բացումը կարևոր է նաև Հայաստանի համար։
Անցակետը՝ սահմանը, փակվել է մարտի կեսերին ու հայկական բեռների համար բացվել է բացառիկ դեպքերում։