Հայաստանում արտակարգ դրության ժամկետը, հնարավոր է, մեկ ամսով երկարաձգվի
Պարետատունը քննարկում է արտակարգ դրությունը երկարաձգելու հարցը, Aysor.am-ի հետ զրույցում ասել է ՀՀ փոխվարչապետ, պարետ Տիգրան Ավինյանի մամուլի խոսնակ Վահան Հունանյանը։
«Հիմա քննարկվում է երկարաձգելու հնարավորությունը, քանի որ այն հանգամանքները, որոնք բերել են արտակարգ դրության հայտարարման, չեն վերացել»,- ասաց Վահան Հունանյանը։
Նա նշեց, թե այս պահին կոնկրետ ժամկետներ չկան, թե որքան կերկարաձգվի արտակարգ դրությունը։
«Ամենայն հավանականությամբ, կերկարաձգվի ևս մեկ ամսով»,- ասել է Տիգրան Ավինյանի խոսնակը։
Հարցին՝ ոլորտները, որոնք այս օրերին վերսկսել են աշխատանքը, նորից կփակվե՞ն, ի՞նչ որոշում կա այդ մասով, Վահան Հունանյանը նշեց, թե ցանկացած խստացում և մեղմացում հիմնվում է որոշակի զարգացումների ու վերլուծությունների վրա։
«Եթե տեսնում ենք, որ որևէ ոլորտում խնդիր կա ու անհրաժեշտություն կա խստացման, որոշումը կայացվում է, եթե ոչ՝ մեղմացվում է։ Այս պահի դրությամբ՝ նման ոլորտ չկա, եթե անհրաժեշտություն լինի, մենք որոշում կկայացնենք ու կտեղեկացնենք» – հավելել է Վահան Հունանյանը։
