«Ֆեյսբուքը» վրացական քաղաքական կուսակցությունների մոտ 900 օգտահաշիվներ է ջնջել
«Ֆեյսբուքը» ջնջել է մոտ 900 հաշիվ, որոնց մեծ մասը (790) կապված են եղել իշխող «Վրացական երազանք» կուսակցության հետ: Այս մասին ասվում է «Ֆեյսբուքի» ապրիլյան զեկույցում, որը հրապարակվել է մայիսի 6-ին:
Ըստ հաղորդագրության, «Վրացական երազանք»-ի հետ կապված 790 հաշվից 511-ը էջ է, 122-ը խումբ, 101 ֆեյսբուքյան և 56 ինստագրամյան հաշիվ:
Նշվում է նաև, որ հաշիվները կապված են եղել Կոկա Կղանդիաշվիլու «Espersonna» լրատվական կազմակերպության հետ: Facebook-ից ջնջվել է նաև Կղանդիաշվիլու անձնական հաշիվը:
«Ֆեյսբուքի» հաղորդագրության համաձայն՝ DFRLab-ի հետազոտողները պարզել են, որ պետական համակարգի նախկին աշխատակից Կոկա Կղանդիաշվիլին և նրա կինը՝ Թբիլիսիի քաղաքային խորհրդի հասարակայնության հետ կապերի բաժնի ղեկավարը, մշակված սխեմայի ղեկավարներ են: Նրանց անձնական հաշիվները ևս ջնջվել են, քանի որ դրանք կապված են խմբերի և էջերի հետ, որոնք կեղծ լուրերի միջոցով տարածում էին իշխանամետ և հաճախ հակաարևմտյան քարոզչություն:
