Վրաստանում պարետային ժամը կգործի մինչև մայիսի 22-ը
Վրաստանի վարչապետի ապարատի ղեկավար Նաթիա Մեզվրիշվիլին Rustavi 2-ի եթերում խոսել է պարետային ժամի վերացման մասին: Նրա խոսքով՝ կառավարության ծրագրում չեն ներառվել պարետային ժամի, ինչպես նաև հանրային տրանսպորտի սահմանափակումների վերացման կոնկրետ ժամկետները, քանի որ դրանք կախված են համաճարակային իրավիճակի հետ:
«Այս ամենը կմնա ուժի մեջ արտակարգ դրության ժամկետով: Ինչպես գիտենք արտակարգ դրությունը երկարաձգվեց մինչև մայիսի 22-ը ներառյալ, ինչը նշանակում է, որ այս ընթացքում կգործեն բոլոր այն սահմանափակումները, որոնք չեն վերացվել ապրիլի 27-ին: Պարետային ժամի և հանրային տրանսպորտի սահմանափակման նպատակը փողոցներում հավաքվելու նվազեցումն է»,- հայտարարել է Մեզվրիշվիլին:
Մեզվրիշվիլին նաև հավելել է, որ եթե փոխվի համաճարակային իրավիճակը, հնարավոր է, պարետային ժամի և հանրային տրանսպորտի սահմանափակումների վերացումը ավելի շուտ տեղի ունենա:
Նշենք, որ վերջին տվյալներով՝ Վրաստանում կորոնավիրուսով վարակի 6 նոր դեպք է գրանցվել, ընդհանուր դեպքերի քանակը երկրում 517 է: Վրաստանում կորոնավիրուսից բուժվել է 168 մարդ, մահացել՝ 6-ը:
