Իրանցի բժիշկներն ու «Le Figaro» թերթն անուղղակիորեն մեղադրել են ԱՄՆ-ին
Արդեն Հայաստանի քաղաքացիների ուշադրությունը հրավիրել ենք այն փաստի վրա, որ աշխարհի շատ երկրներում փորձագետները եկել են այն եզրակացության, որ կորոնավիրուսը՝COVID-19-ը, ստեղծվել է արհեստականորեն, ինչ-որ լաբորատորիայում և կարող է նախագծված լինել`կենտրոնանալով մարդու ԴՆԹ-ի վրա: Բայց ահա մարտի 21-ին ֆրանսիական «Le Figaro» ազդեցիկ թերթը հրապարակել է տեղեկատվություն, որն ամրապնդում է նման կասկածները: Փարիզում գրել են, որ մարդկությունը նախազգուշացվել է գլոբալ պանդեմիայի վտանգի մասին, պարզվում է, 2009-ին, ընդ որում՝ նախազգուշացնում էր… ԱՄՆ ԿՀՎ վերլուծական կենտրոնը: Մինչև 2025 թվականը համաշխարհային տենդենցների վերաբերյալ կենտրոնի զեկույցում նշվում էր, որ «մարդկանց շրջանում խիստ վարակիչ շնչառական հիվանդության առաջացումը, որի համար համապատասխան միջոցներ չեն ձեռնարկվի, կարող է համաշխարհային պանդեմիայի պատճառ դառնալ»: Ավելին, ֆրանսիական թերթը հիշեցրել է, որ, պարզվում է, 2017-ին ամերիկացի միլիարդատեր Բիլ Գեյթսը, որը դեռ այս տարվա փետրվարին առաջարկում էր կորոնավիրուսի դեմ իր «սեփական» պատվաստանյութը, Մյունխենում կայացած անվտանգության խորհրդաժողովում ասել է, թե պետությունները պատշաճ ուշադրություն չեն դարձնում սանիտարական վիճակի և միջազգային անվտանգության միջև կապին: Նա իբր կանխատեսել է, որ դեռ իր կյանքի ընթացքում տեղի կունենա գլոբալ պանդեմիա՝ բարձր մահացությամբ՝ հորդորելով պատրաստվել դրան, ինչպես զինվորականներն են պատրաստվում պատերազմի:
Դե, ինչպես ասում են, Աստված կամեցավ որ ենթադրենք, որ և ԱՄՆ ԿՀՎ-ն, և միլիարդատեր Գեյթսը ներգրավված էին գլոբալ պանդեմիայի մասին կանխատեսումների իրականացման գործում, չնայած շատ բան խոր կասկածներ է առաջացնում մոլորակի հետ կատարվածի վերաբերյալ: Սակայն աշխարհը շատ է փոխվել և 2009, և 2017 թվականներից հետո: Այժմ գրեթե ոչ մի տեղ չեն մնացել միամիտ մարդիկ, ովքեր շարունակում են կուրորեն հավատալ Ամերիկային և ԱՄՆ ղեկավարության անսխալականությանը: Ահա թե ինչ է օրերս հաղորդել իրանական անգլալեզու Press TV հեռուստաալիքը: Իրանացի բժիշկների մի խումբ բաց նամակ է գրել, ինչպես ասվում է հաղորդման մեջ, «տարածաշրջանային պետությունների որոշ ղեկավարների»՝ կոչ անելով նրանց անհրաժեշտ միջոցներ ձեռնարկել «ԱՄՆ բոլոր կենսաբանական լաբորատորիաները» ոչնչացնելու համար՝ այն զեկույցների և ենթադրությունների համապատկերին, որ կորոնավիրուսի գլոբալ բռնկումն առաջացել է չնույնականացված լաբորատորիաների կողմից, որոնք տարածում են համաճարակը՝ որպես «կենսաբանական պատերազմի» մաս: Վրաստանի, Իրաքի, Ղրղզստանի, Ղազախստանի, Պակիստանի, Աֆղանստանի և այլ երկրների առաջնորդներին ուղղված նամակում վարակիչ և թոքային հիվանդությունների, ասթմայի և ալերգիայի մեջ մասնագիտացված 101 իրանացի բժիշկներ կոչ են արել անհապաղ գործողություններ իրականացնել այդ երկրների կողմից՝ հաշվի առնելով COVID-19 վիրուսի արագ տարածումը:
«Մենք՝ իրանացի բժիշկների մի խումբ, վկա ենք այն փաստի, որ մեր հայրենակիցներից շատերը վարակված են վիրուսով, և, ինչպես աշխարհի բոլոր բժիշկները, մենք օրեցօր փորձում ենք բուժել և փրկել նրանց,- գրում են իրանացի բժիշկները:- Սակայն կան շատ ապացույցներ՝ ինչպես աշխարհի առաջատար գիտական հոդվածներում, այնպես էլ ԶԼՄ-ներում, որոնք վկայակոչում են գենետիկների և կենսաբանների, ինչպես նաև WikiLeaks-ի փաստաթղթերը, որոնք ամրապնդում են կենսաբանական լաբորատորիաներում COVID-19 մանիպուլյացիաների վերաբերյալ ենթադրությունները և այս վիրուսի միջոցով ԱՄՆ կենսաբանական հարձակումը մրցակցող երկրների դեմ»: Նամակի հեղինակները նշում են, օրինակ, Չինաստանի արտգործնախարարության ներկայացուցիչ Չժաո Լիցզյանի ավելի վաղ դիտողությունների մասին, որն իր «Թվիթերում» գրել էր, թե ԱՄՆ զինված ուժերը կարող էին նոր կորոնավիրուսը բերել Չինաստան, և որ այն ծագել է ամենևին էլ ոչ չինական Ուհան քաղաքում, ինչպես ընդունված է համարել: «Հնարավոր է՝ հենց ԱՄՆ բանակն է համաճարակը բերել Ուհան: Եղեք թափանցիկ: Կիսվեք ձեր տվյալներով: ԱՄՆ-ը պետք է մեզ բացատրի»,- գրել է այն ժամանակ Չժաո Լիցզյանը:
Իրանցի բժիշկները հայտարարել են, որ ԱՄՆ արդեն երկար ժամանակ է կենսաբանական զենք օգտագործում՝ շեշտելով, որ «անհրաժեշտ է փրկել մարդկային կյանքերը և ապագա սերունդներին թույլ չտալ, որ մեզ դատապարտեն լռության և մեր հնարավոր անգործության համար՝ մարդկության պատմության մեջ այդ հսկայական հանցագործության վերաբերյալ»: Նամակում նշվում է տարբեր միջազգային համաձայնագրերից և պայմանագրերից ԱՄՆ-ի դուրս գալու մասին, և կա հայտարարություն այն մասին որ, ըստ ամենայնի, Վաշինգտոնը չի հետևելու կենսաբանական զենքի զարգացումը կարգավորող միջազգային համաձայնագրերին, ինչպիսիք են «Ժնևյան արձանագրությունը» և «Մանրէաբանական և տոքսին զենքերի մշակումը, արտադրությունն ու պահեստավորումը արգելելու մասին Կոնվենցիան»: «Չէ՞ որ ԱՄՆ-ը հրաժարվել է ստորագրել մանրէաբանական զենքի կանխարգելման արձանագրությունները»,- ասվում է նամակում:
Մենք հեռու ենք այն մտքից, որ Չժաո Լինցզյանի հայտարարությունները և իրանցի բժիշկների նամակը բավարար ապացույցներ են հաստատելու համար, որ հենց ԱՄՆ-ն է աշխարհը դատապարտել COVID-19 վիրուսի պանդեմիայի տարածմանը: Սակայն արդեն կա նաև ֆրանսիական «Le Figaro» թերթի հրապարակումը, և Փարիզը դժվար թե ստի 2009 թվականի ԿՀՎ վերլուծական կենտրոնի զեկույցի և 2017 թվականի Գեյթսի հայտարարությունների մասին: Ամեն դեպքում, առաջատար, մեծ տերությունների ղեկավարները ունեն բանակցություններ վարելու հիմքեր, եթե իսկապես ԱՄՆ կոպտորեն խախտել է միջազգային կենսաբանական զենքի վերաբերյալ պայմանագրերը: Դե, կամ էլ ԱՄՆ բնակիչներն իրենց մաշկի վրա կզգան կորոնավիրուսի ազդեցությանը ենթարկված երկրների պատասխանը: Այնուամենայնիվ, մեզ որպես Հայաստանի քաղաքացիների, հետաքրքրում է նաև հետևյալ հարցը. արդյո՞ք իրանցի բժիշկների նամակը հասցեագրված է նաև մեր երկրի և Ադրբեջանի իշխանություններին: Չէ՞ որ միայն Վրաստանում չկան ամերիկյան կենսաբանական լաբորատորիաներ, որոնց հովանավորում է ԱՄՆ Պենտագոնը…
Սերգեյ Շաքարյանց
