Ինչո՞ւ է Արցախի իշխանությունը հապաղում երկրում արտակարգ դրություն հաստատել (տեսանյութ)

Արցախի Հանրապետությունում շարունակվում է նախագահական և խորհրդարանական ընտրությունների քարոզարշավը՝ մարտի 31-ին կայանալիք ընտրություններին ընդառաջ։ Բարեբախտաբար, կորոնավիրուսը չի ներթափանցել Արցախ, և առ այսօր չի գրանցվել վարակվածության որևէ դեպք: Սա էլ հիմք է տալիս  Արցախի իշխանությանը հայտարարել, թե արտակարգ դրություն սահմանելու անհրաժեշտություն չկա։

Սակայն իրավիճակով խիստ անհանգստացած է Արցախի նախագահի թեկնածու, Արցախի հերոս, գեներալ  Վիտալի Բալասանյանը: Ըստ նրա, երկիրը պատրաստ չէ նման վտանգի հետ առերեսվելու, ասել է թե Արցախի համար նման համաճարակի տարածումը կարող է  խիստ վտանգավոր լինել: Հետևաբար, Արցախի հերոսը իշխանություններին կոչ է անում չհապաղել և  արտակարգ դրություն հաստատել երկրում այնպես, ինչպես Հայաստանում է:

Դեռ օրեր առաջ Վիտալի Բալասանյանը  դիմել էր ԱՀ նախագահ Բակո Սահակյանին ու  ներկայացրել կորոնավիրուսի տարածման վտանգավորությունը Արցախի համար, տրամադրել  համապատասխան վերլուծություն, փաստել, որ Արցախի  բնակչության 18% գտնվում է բարձր ռիսկային գոտում։

Թե ինչո՞ւ է Արցախի իշխանությունը հապաղում և  արտակարգ դրություն չի հայտարարում, Արցախի նախագահի աշխատակազմի ղեկավարի տեղակալ Դավիթ Բաբայանը մեկնաբանել է այսպես՝ դրա անհրաժեշտությունը դեռ չկա, քանի որ. «Չունենք գեթ մեկ վիրուսակիր։ Նման հարց կդիտարկվի, երբ ներթափանցի վիրուսն Արցախ և կրի մասսայական բնույթ»։ Անկեղծ ասած, պատասխանը զարմացնող է, ի՞նչ է, վիրուսը պետք է թափանցի երկիր, կրի մասսայական բնույթ, որ դրանից հետո միայն իշխանությունը տեղից շարժվի՞, մտածի կոնկրետ քայլերի մասին: Սա լուրջ մոտեցում չէ:  Հայաստանի իշխանության անտարբերությունն ու անլրջությունը, ինչը    պատճառ դարձավ վիրուսակիրների թվի աճի, պետք է սթափեցնի Արցախի իշխանությանը:

Իր  հայտարարության մեջ  Բալասանյանը տեղին հիշեցնում է, որ աշխարհի մի քանի պետություններ, չունենալով վարակման որևէ դեպք, վտանգը կանխելու համար սահմանել են արտակարգ դրություն: Հետևաբար չարժե նստել, սպասել, որ համաճարակը դուռդ թակի ու նոր միայն գործողություններ անես:

Արցախի նախագահի թեկնածու Վ. Բալասանյանն Արցախի իշխանությունից պահանջում է նաև հետաձգել մարտի 31-ին կայանալիք նախագահական և խորհրդարանական ընտրությունների անցկացումը: Իր պահանջը գեներալը  հիմնավորում է՝ բերելով մի շարք երկրների՝ ԱՄՆ-ի, Մեծ Բրիտանիայի օրինակը: Այսպես, կորոնավիրուսի տարածման վտանգով պայմանավորված, ԱՄՆ-ը մի քանի նահանգներում հետաձգել է նախնական նախագահական ընտրությունների անցկացումը: Մեծ Բրիտանիայում ևս կառավարությունը որոշել է այս տարվա մայիսին նշանակված տեղական ինքնակառավարման մարմինների ընտրությունները հետաձգել 12 ամսով: Ի վերջո, Հայաստանում ևս, պայմանավորված կորոնավիրուսի տարածման վտանգով, հետաձգվեց սահմանադրական փոփոխությունների հանրաքվեն:

Ի՞նչն է խանգարում, որպեսզի Արցախը ևս գնա այդ ճանապարհով, ինչո՞ւ չանել հնարավոր կանխարգելիչ քայլը՝ ժողովրդին հեռու պահելով վտանգից: Արդյո՞ք քաղաքական հաշվարկներն ու  շահերն առավել առաջանային են, քան ժողովրդի անվտանգությունը: Ինչո՞ւ է Արցախի իշխանությունը հապաղում  արտակարգ դրություն սահմանելուց,  ի՞նչն է կաշկանդում Արցախի իշխանությանը հետաձգել ընտրությունները: Տպավորություն կա, որ կաշկանդվածության պատճառը  ՀՀ վարչապետ Նիկոլ Փաշինյանի օրերս հնչեցրած հայտարարությունն է, թե Արցախում ընտրությունները չպետք է հետաձգվեն: Փաշինյանն ասել էր, թե ինքը դրա համար  հիմքեր չի տեսնում: Սա ի՞նչ է, եթե ոչ ուղղակի միջամտություն Արցախի ներքին գործերին, ի՞նչ է, եթե ոչ հստակ ուղղորդում: Իսկ պատասխանատո՞ւ է Փաշինյանը արցախահայության առաջ՝ կորոնավիրուսի տարածման վտանգի դեպքում: Թե՞ այդ անգամ էլ օգնության կգա դատարկ պուպուլիզմը, սուտն ու կեղծիքը, սեփական անձն ամեն կերպ արդարացնելու ճկունությունը` ինչով  օժտված է ՀՀ վարչապետը:

«Հայաստանն ու Արցախը իրարից մեկուսացված տարածքներ չեն, գտնվում են անվտանգության նույն համակարգի մեջ, չկա ազատ տեղաշարժի որևէ արգելք, բայց Հայաստանում հայտարարված է արտակարգ դրություն, սահմանադրության կետի վերաբերյալ հանրաքվեն հետաձգված է, իսկ Արցախում՝ ոչ»,- ասում է  Վիտալի Բալասանյանը: Մտահոգ է գեներալը՝ երկրի առջև ծառացել է ժողովրդի առողջության անվտանգությանն սպառնացող լրջագույն վտանգ, մինչդեռ. «Արցախի իշխանությունն ընտրում է արտակարգ դրություն չսահմանելու ճանապարհը։ Քաղաքական շահերը վեր են դասվում համամարդկային շահերից»։

Բալասանյանը  հիշեցնում է  ժողովրդի առաջ ունեցած պատասխանատվության մասին. «Ես հարց եմ ուղղում իշխանություններին և այն թեկնածուներին, որոնք պնդում են ընտրությունների անցկացման անհրաժեշտությունը՝ քվեարկության օրը ընտրատեղամասերում ինչպե՞ս եք ապահովելու ընտրողների անվտանգությունը, ո՞վ է անձամբ ստանձնելու այդ պատասխանատվությունը»:

Տեղեկացնենք, որ  նախագահի թեկնածուն արդեն մեկ շաբաթ է, որ ամբողջությամբ դադարեցրել է ընտրողների հետ զանգվածային հանդիպումները։ Մենք տեղեկացանք նաև, որ նախագահի մի շարք թեկնածուներ ևս փոխել են  ընտրությունների քարոզարշավի բնույթն ու ընտրողների հետ առցանց ռեժիմով են  հանդիպում: Սա նշանակում է՝ քարոզարշավի ընթացքն արդեն իսկ խաթարված է:

«Ես պատրաստ եմ շարունակել նախընտրական քարոզարշավն առանց ընտրողների հետ զանգվածային հանդիպումների, ես վստա՛հ եմ իմ հաղթանակի մեջ»,- նշում է գեներալ Բալասանյանը, բայց միաժամանակ հավելում. «Երբ ամբողջ աշխարհը խոսում է պատերազմի և Մեծ դեպրեսիայի նման վտանգի մասին, ես չեմ կարող ինձ թույլ տալ անմասն մնալ, չեմ կարող լռել»:

Արցախի գեներալը իշխանությանը սթափության կոչ է անում ու վերստին հիշեցնում՝ որքան շուտ արտակարգ դրություն հայտարարվի, այնքան ավելի շատ կյանքեր կփրկենք:

Բայց  քանի դեռ Արցախի  իշխանությունը ձեռնպահ է մնում արտակարգ դրություն հայտարարելուց, Բալասանյանն իր կոչն ուղղում է ժողովրդին` կամավոր պահպանել արտակարգ  դրության  ռեժիմը. «Բոլոր նրանց, ովքեր լսում են ինձ, կոչ եմ անում` կամավոր պահպանեք կարանտինի ռեժիմը: Մեր կյանքը մեր ձեռքերում է: Աստված մեզ պահապան»:

Տեսանյութը՝

Արմինե Սիմոնյան