Հրայր Թովմասյանն իր աշխատավարձը փոխանցել է գիշերուզօր աշխատող մեր անձնուրաց բուժաշխատողներին
Սահմանադրական դատարանի նախագահ Հրայր Թովմասյանը հայտարարություն է տարածել։ Նա տեղեկացնում է, որ գնահատելով մեր բուժաշխատողների այս օրերին կատարած անձնուրաց աշխատանքը, երախտագիտության իր քայլ է կատարում՝ իր հիմնական աշխատավարձը, նաև մի քանի ամսվա պարգևավճարների ողջ հասույթը փոխանցելով բուժաշխատողներին։
Ստորև ներկայացնում ենք հայտարարությունը․
«Սիրելի՛ հայրենակիցներ,
Ի երախտագիտություն այս օրերին մեր բուժաշխատողների անձնուրաց աշխատանքի՝ որոշել եմ այս ամսվա իմ հիմնական աշխատավարձը, ինչպես նաև այս և մյուս ամիսների իմ պարգևավճարների ողջ հասույթը փոխանցել մեր բուժաշխատողներին։
Սա երախտագիտության փոքրիկ քայլ է, որը թեև խորհրդանշական բնույթ է կրում, բայց շատ կարևոր խորհուրդ ունի: Սեփական կյանքը վտանգելու գնով մեր ազգաբնակչության առողջապահության մասին գիշեր-ցերեկ հոգ տանող մասնագետները պետք է գնահատված զգան իրենց: Իմ խորին համոզմամբ՝ սա է հաջող աշխատանքի գրավականը։
Կասկած չունեմ, որ մեր միասնականության, միմյանց քաջալերելու, նեցուկ լինելու և վճռականության շնորհիվ այս փորձությունը ևս մոտ ապագայում դառնալու է անցյալ։
Աստված պահապան մեր երկրին ու ժողովրդին»։
