Սերժ Սարգսյանի և մյուսների գործով դատարանը վաղը կներկայացնի բացարկի միջնորդության վերաբերյալ որոշումը (տեսանյութ)

Երևանի ընդհանուր իրավասության դատարանի Ավան և Նոր Նորք նստավայրում տեղի ունեցավ ՀՀ երրորդ նախագահ Սերժ Սարգսյանի գործով առաջին դատական նիստը։

Գործով մեղադրյալներ են նաև նախկին գյուղնախարար Սերգո Կարապետյանն ու «Ֆլեշ» ընկերության սեփականատեր Բարսեղ Բեգլարյանը, Գյուղնախարարության նախկին պաշտոնյա Գևորգ Հարությունյանը։

Դատական գործը քննում է Երևանի առաջին ատյանի ընդհանուր իրավասության դատարանի դատավոր Վահե Միսակյանը։

Սերժ Սարգսյանի նկատմամբ խափանման միջոց է ընտրվել ստորագրությունը չհեռանալու մասին։ Նա մեղադրանքը չի ընդունում, իսկ նրա փաստաբանները պնդում են՝ նախկին նախագահի նկատմամբ քաղաքական հետապնդում է իրականացվում:

Հատուկ քննչական ծառայությունը ձեռք բերված ապացույցները բավարար էր համարել՝ գործը դատարան ուղարկելու համար, Դատախազությունն անցած ամսվա վերջին հաստատել է մեղադրական եզրակացությունն ու գործն ուղարկել դատարան։

Սերժ Սարգսյանի պաշտպանը բացարկի միջնորդություն է ներկայացրել մեղադրող դատախազ Արսեն Մարտիրոսյանին։ Հղում անելով մի շարք օրենսդրական կարգավորումների՝ Սերժ Սարգսյանի պաշտպաններից Հակոբյանը միջնորդեց, որ մինչդատական վարույթում քրեական բավարար միջոցներ չեն ձեռնարկել Սերժ Սարգսյանին արդարացնող հանգամանքների քննության համար: Հսկող դատախազը նախաքննության խախտումները չի նկատել, ավելին՝ Քրեական դատավարության օրենսգրքի խախտումներ է թույլ տվել։ Որպես օրինակ բերեց այն, որ առերեսումից երկու րոպե անց փաստաթուղթը շրջել ու հայտնել է Սերժ Սարգսյանին, որ դա իրեն առաջադրված մեղադրանքն է, որոշման մեջ էլ ժամը նշված չի եղել հասկանալի պատճառներով։ «Այսինքն, Սերժ Սարգսյանին մեղադրյալի դատավարական կարգավիճակ տրված է եղել մինչև հարցաքննությունը, մինչ այդ ամեն ինչ որոշված է եղել ու հավանաբար այլ անձի մոտ»,-ասաց պաշտպան Հակոբյանը հավելելով, որ մեղադրանքն ապօրինի է։

Մեղադրող դատախազ Արսեն Մարտիրոսյանն ասաց, որ գործով մեղադրյալների պաշտպանների կողմից լրատվականներով արվող հայտարարությունները, թե Սերժ Սարգսյանի մեղադրանքի հիմքում դրված է բացառապես մեկ ցուցմունք, քրեական գործի նյութերից չբխող ընդհանրական, վերացական բնույթի հայտարարություն է: Նրա խոսքով՝ մեղադրական եզրակացության մեջ մանրամասն ներկայացված են այն բոլոր ապացույցները, որոնք դրվել են ինչպես Սերժ Սարգսյանի, այնպես էլ գործով մյուս ամբաստանյալների մեղադրանքի հիմքում:

Անդրադառնալով պաշտպանների դիտարկմանը, թե Սերժ Սարգսյանի նկատմամբ քրեական հետապնդում է հարուցվել՝ անտեսելով հանգամանքը, որ Սերժ Սարգսյանն օժտված է քրեական հետապնդման անձեռնմխելիության իրավունքով, Մարտիրոսյանն ասաց. «Նշված հանգամանքը Սերժ Սարգսյանին որպես մեղադրյալ ներգրավելու մասին որոշում կայացնելուց անմիջապես հետո, պաշտպանների կողմից բողոքարկվել է դատավարական ղեկավարում իրականացվող դատախազին և վերջինս վկայակոչել է ՀՀ սահմանադրության 45-րդ հոդվածի իրավադրույթներից, որից էլ պարզ է դառնում, որ բարձրագույն իրավաբանական ուժ ունեցող և անմիջական կիրառություն ունեցող իրավական ակտը Հանրապետության նախագահի պաշտոն զբաղեցնող անձին օժտել է բավականին լայն լիազորությունների ցանկով և նրան անխոչընդոտ իրականացման համար նախատեսել է իր լիազորությունների ժամկետում և դրանից հետո բացառապես իր կարգավիճակից բխող գործողությունների կատարման առնչությամբ անձեռնմխելիությամբ»,- ասաց նա՝ նշելով, թե Սարգսյանն իր կարգավիճակից չբխող գործողությունների համար կարող է պատասխանատվության ենթարկվել իր լիազորությունների ավարտից հետո:

Նա նշեց, թե պաշտպանների կողմից իրեն ներկայացված միջնորդությունն անհիմն է:

Դատարանը հեռացավ խորհրդակցական սենյակ՝ պաշտպանների կողմից դատախազ Արսեն Մարտիրոսյանին ներկայացված միջնորդության վերաբերյալ որոշում կայացնելու: Այն կհրապարակվի սույն թվականի փետրվարի 26-ին՝ ժամը 15:30-ին: Որոշումը հրապարակելուց հետո դատարանը քննարկելու է դատական նիստը հետաձգելու հարցը:

Հիշեցնենք, որ ըստ ծավալուն մեղադրանքի, 2013 թվականի հունվարի 24-ի որոշմամբ Հայաստանի կառավարությունը հաստատել է հողօգտագործողներին գարնան գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագիրը: Դրա շրջանակում նախատեսվել է մարզպետարանների և Գյուղատնտեսության նախարարությանը պատկանող կազմակերպությունների ներկայացրած հայտերի հիման վրա հողօգտագործողներին վաճառել ավելի քան 17 միլիոն լիտր դիզելային վառելիք: Վառելիք մատակարարելու ցանկություն են հայտնել մի շարք, այդ թվում` «Մաքսհուր» և «Ֆլեշ» ընկերությունները:

Ամենաէժան գնային առաջարկը ներկայացրել է «Մաքսհուր» ընկերությունը, որի ներկայացուցչի հետ քննարկումներից հետո Գյուղատնտեսության նախարարության պաշտոնատար անձանց կողմից որոշվել է որպես մատակարար հենց այս ընկերության տվյալները ներկայացնել կառավարության հաստատմանը:

Ինչպես նշվում է ՀՔԾ հաղորդագրությունում, Սերժ Սարգսյանը տեղյակ է եղել, որ ավելի էժան գնով վառելիք է առաջարկում հենց այս ընկերությունը, գիտակցել է, որ ավելի բարձր գին առաջարկած «Ֆլեշ» ընկերության հետ դիզելային վառելիքի մատակարարման սուբսիդիայի պայմանագիր կնքելու հետևանքով պետությունից անհիմն ելքագրվելու են առանձնապես խոշոր չափերով գումարներ:

Եվ անտեսելով այս հանգամանքը, նախկին նախագահը «Ֆլեշ» ընկերության համար գործարքից առավելագույն շահույթ ապահովելու անձնական շահագրգռվածությունից ելնելով, օգտագործելով իր պաշտոնեական դիրքը, իր ենթակայության ներքո գտնվող մի խումբ պաշտոնատար անձանց միջոցով կազմակերպել է կառավարությանը վստահված, պահուստային ֆոնդում գտնվող առանձնապես խոշոր չափերով գումարի` վատնելու եղանակով հափշտակության կատարումը, մասնավորապես` հանձնարարել է իրենից փաստացի ծառայողական կախվածության մեջ գտնվող պաշտոնատար անձանց՝ անկախ ստացված էժան գնային առաջարկներից, որպես մատակարար ընտրել «Ֆլեշ» ընկերությանը և մատակարարման պայմանագիրը կնքել այդ ընկերության հետ:

Սրա հետևանքով, ըստ ՀՔԾ-ի, կառավարության որոշմամբ պահուստային ֆոնդի հաշվից ավելի քան 17 միլիոն լիտր դիզելային վառելիքի մատակարարման համար Գյուղատնտեսության նախարարությանն է տրամադրվել մոտ ավելի քան 1 միլիարդ 700 միլիոն դրամ, որն էլ փոխանցվել է «Ֆլեշ» ընկերության բանկային հաշվին:

Հետագայում, ինչպես հաղորդում է ՀՔԾ-ն, կառավարությունը որոշել է հատկացվող վառելիքի քանակն ավելացնել ևս 302 հազար լիտրով, իսկ տրամադրված գումարի չափն ավելացնել ավելի քան 31 միլիոն դրամով: Ավելացված գումարը ևս փոխանցվել է «Ֆլեշ» ընկերությանը:

Ըստ ՀՔԾ-ի, այս ծրագրի արդյունքում իրացվել է ավելի քան 12 միլիոն լիտր վառելիք, ինչի համար տրամադրված սուբսիդիայի գումարի չափը կազմել է ավելի քան 1 միլիարդ դրամ: Մինչդեռ մատակարարման իրական հնարավորություններ ունեցող «Մաքսհուր» ընկերության առաջարկած գնով նույն քանակը մատակարարելու դեպքում սուբսիդիայի գումարը կկազմեր ընդամենը 846 միլիոն դրամ, այսինքն՝ վատնվել է ավելի քան 423 միլիոն դրամ ավելի վճարված գումարը:

Չիրացված վառելիքի մնացած մասի՝ ավելի քան 5 միլիոն լիտրի համար տրամադրված մոտ 552 միլիոն դրամը, կառավարության որոշմամբ թողնվել է «Ֆլեշ» ընկերությանը՝ 2013 թվականի աշնան գյուղատնտեսական աշխատանքների ժամանակ պետական աջակցության ծրագիրն իրականացնելու համար: Կառավարության որոշմամբ՝ 2013 թվականի սեպտեմբերի 12-ին Գյուղատնտեսության նախարարության և «Ֆլեշ» ընկերության միջև կնքվել է «Սուբսիդիա տրամադրելու մասին» պայմանագիր, համաձայն որի՝ տրամադրված մոտ 552 միլիոն դրամ սուբսիդիան վերաձևակերպվել է 6 միլիոն 131 հազար 062 լիտր դիզելային վառելիքի համար:

Արդյունքում` ծրագրի իրականացման ընթացքում, 2013 թվականի սեպտեմբերի 12-ից մինչև նոյեմբերի 23-ն ընկած ժամանակահատվածում իրացվել է ավելի քան 3 միլիոն լիտր դիզելային վառելիք, ինչի համար տրամադրված սուբսիդիայի գումարի չափը կազմել է ավելի քան 297 միլոն դրամ: Մինչդեռ մատակարարման իրական հնարավորություններ ունեցող «Մաքսհուր» ընկերության առաջարկած գնով նույն քանակը մատակարարելու դեպքում սուբսիդիայի գումարը կկազմեր ընդամենը 231 միլիոն 240 հազար 170 դրամ, այսինքն՝ փաստացի վճարված սուբսիդիայի գումարից վատնվել է ավելի քան 66 միլիոն դրամ ավելի վճարված գումար:

Մանրամասները՝ տեսանյութում