Հանրաքվեի քարոզարշավը կսկսվի փետրվարի 17-ից, «Ոչ» քարոզչական շտաբը կարող է գրանցվել 7-օրյա ժամկետում
Սահմանադրությունում փոփոխություն իրականացնելու համար ապրիլի 5-ին նախատեսված հանրաքվեի քարոզարշավը կմեկնարկի փետրվարի 17-ից: Քարոզարշավի համար սահմանված է 44-օրյա ժամկետ: Այս մասին լրագրողների հետ զրույցում տեղեկացրել է Կենտրոնական ընտրական հանձնաժողովի նախագահ Տիգրան Մուկուչյանը:
«Շատ կարճ ժամկետներ ունենք կազմակերպչական աշխատանքներ իրականացնելու համար: Երեկվանից արդեն տարածքային ընտրական հանձնաժողովների հետ միասին մեկնարկել են նախապատրաստական աշխատանքները»,- ասել է Տիգրան Մուկուչյանը:
Կենտրոնական ընտրական հանձնաժողովի նախագահն այս պահին հստակեցնել չի կարող, թե ՀՀ քանի՞ քաղաքացի ունի հանրաքվեին մասնակցելու իրավունք: Նրա խոսքով՝ ցուցակներ կազմելու իրավունքը պատկանում է լիազոր մարմնին, և դրանք կհրապարակվեն մի քանի օրից:
Հանրաքվեի մասին ՀՀ սահմանադրական օրենքի համաձայն՝ հանրաքվեի դրված օրենքի կամ փոփոխության նախագիծը համարվում է ընդունված, եթե կողմ է քվեարկել քվեարկության մասնակիցների կեսից ավելին, սակայն ոչ պակաս, քան քվեարկելու իրավունք ունեցող քաղաքացիների թվի 1/4-ը:
Ընտրությունների համար նախատեսվելիք գումարը, ըստ ԿԸՀ նախագահի, կլինի նույնը, ինչ եղել է նախորդ՝ 2018 թվականի ընտրությունների ժամանակ՝ 2.5-2.7 մլրդ դրամ:
Տիգրան Մուկուչյանի խոսքով՝ պատճառն այն է, որ գործառութային տարբերություններ գրեթե չկան, հարցը միայն նվազագույն աշխատավարձի որոշակի աճն է, իսկ հանձնաժողովներում ընդգրկված քաղաքացիների՝ հանձնաժողովի անդամների և տեխնիկական սարքավորումը սպասարկող մասնագետների աշխատավարձի համար բազային է ընդունվում հենց նվազագույն աշխատավարձը:
Բյուջեով ընտրությունների համար տրամադրվող գումարի ավելացում Տիգրան Մուկուչյանը չի ենթադրում: Ըստ նրա՝ գրեթե անհավանական է, որ կավելանա նաև ընտրական տեղամասերի թիվը (2018 թվականին եղել է 2010 ընտրական տեղամաս), ու հնարավոր է, որ անգամ կրճատումներ լինեն:
Բացի հասարակական կազմակերպություններից՝ տեղամասերում որպես դիտորդ կարող են ներգրավվել ոչ միայն ԱԺ կուսակցությունների, այլև Հայաստանում գործող ցանկացած կուսակցության ներկայացուցիչներ:
Արդեն հայտնի է, որ «Այո»-ի շտաբը ղեկավարելու է տարածքային կառավարման և ենթակառուցվածքների նախարար Սուրեն Պապիկյանը:
Օրենքի համաձայն «Ոչ» քարոզչական շտաբ նախաձեռնելու համար կարող է դիմել և գրանցվել նախագծին դեմ քվեարկած պատգամավորը կամ պատգամավորները: Դրա համար սահմանված է 7-օրյա ժամկետ:
«Եթե այդ ժամկետում «Ոչ» քարոզչական կողմ չի գրանցվում, ապա այդ ժամկետի սպառվելուց հետո 50 քաղաքացիներից կազմված խումբը կարող է դիմել և գրանցվել որպես «Ոչ» քարոզչական նախաձեռնություն: Պետք է նաև նկատի ունենալ, որ օրենքը նախատեսում է, որ կարող է գրանցվել միայն մեկ «Այո» և միայն մեկ «Ոչ» քարոզչական կողմ»,- ասել է ԿԸՀ նախագահ Տիգրան Մուկուչյանը:
