«Նոր պատերազմ՝ նոր տարածքների դիմաց»․ Դավիթ Տոնոյան
ՀՀ պաշտպանության նախարար Դավիթ Տոնոյանը Նյու Յորքում հանդիպել է հայ համայնքի ներկայացուցիչների հետ։ «Ամերիկայի ձայն»–ի հաղորդմամբ, հանդիպմանը քննարկել են հայոց բանակին և ղարաբաղյան հակամարտությանն առնչվող հարցեր։
Դավիթ Տոնոյանը հայտարարել է, որ «տարածքներ՝ խաղաղության դիմաց» ձևաչափը փոխում է։
«Ես` որպես պաշտպանության նախարար, ասում եմ՝ «տարածքներ՝ խաղաղության դիմաց» ձևաչափը ես վերաձևակերպել եմ, մենք հակառակն ենք անելու՝ «նոր պատերազմ՝ նոր տարածքների դիմաց»,- շեշտել է նախարարը:
«Ոչ մի բան չի զիջվելու: Հնարավոր են փոխզիջումներ»,- ընդգծել է նա՝ հավելելով, որ բանակը ձերբազատվելու է պաշտպանական վիճակից, ավելացվելու են գրոհային ստորաբաժանումները:
«Մենք այդ խրամատային վիճակից, անընդհատ պաշտպանական վիճակից ձերբազատվելու ենք,- ասել է Տոնոյանը:- Ավելացնելու ենք այն ստորաբաժանումների թվաքանակը, որոնք կարող են ռազմական գործողությունները տեղափոխել հակառակորդի տարածք»։
