Ցուցում է տրվել առավել արդյունավետ պայքար մղել ապօրինի զենք-զինամթերքի հայտնաբերման, թմրամիջոցների անօրինական շրջանառության և կոռուպցիայի դեմ (տեսանյութ)
Այսօր ՀՀ ոստիկանությունում տեղի է ունեցել օպերատիվ խորհրդակցություն, որը վարել է ՀՀ ոստիկանության պետ Վալերիյ Օսիպյանը:
Հայտնելով այս մասին, ՀՀ ոստիկանությունը տեղեկացրել է, որ խորհրդակցությանը մասնակցել են ոստիկանության պետի տեղակալները, կենտրոնական ապարատի, մարզային և տարածքային ստորաբաժանումների ղեկավարներ:
Մինչ խորհրդակցությանն անցնելը, ոստիկանության պետը վերջերս Երևանի բանկերից մեկում ավազակային հարձակումը կանխելու և ծառայողական պարտականությունները բարեխղճորեն կատարելու համար պարգևատրել է ոստիկանության պետական պահպանության գլխավոր վարչության ծառայող, ոստիկանության ենթասպա Սևակ Բադալյանին:
Խորհրդակցության գլխավոր թեման հանրապետությունում օպերատիվ իրավիճակն է եղել:
Վալերիյ Օսիպյանը անդրադարձել է գրանցված դեպքերին ու բացահայտումների վիճակագրությանը, ստորաբաժանումների պատասխանատուներին հանձնարարել անձնական ուշադրության կենտրոնում պահել սեփականության դեմ ուղղված հանցագործությունների կանխման, նախականխման և բացահայտման ուղղությամբ իրականացվող աշխատանքները:
Ներկայացվել են նաև որոշակի տարածքային բաժինների կողմից կատարված բացահայտումների թվային տվյալներ, որոնք գոհացուցիչ չեն: Ստորաբաժանումների ղեկավարներին հանձնարարվել է սեղմ ժամկետում իրականացնել անհրաժեշտ բոլոր միջոցառումներն իրավիճակը շտկելու և բացահայտումների դրական դինամիկա ապահովելու համար:
Վալերիյ Օսիպյանը հանձնարարել է անցնել ուժեղացված ծառայության: Ցուցում է տրվել առավել արդյունավետ պայքար մղել ապօրինի զենք-զինամթերքի հայտնաբերման, թմրամիջոցների անօրինական շրջանառության և կոռուպցիայի դեմ:
Ոստիկանության ՔՀԳՎ անչափահասների գործերով և ընտանիքում բռնության կանխարգելման վարչությանը հանձնարարվել է, որպեսզի անչափահասի մասնակցությամբ յուրաքանչյուր դեպք առանձին ուսումնասիրվի ու քննության առարկա դառնա: Անհրաժեշտ է անչափահասների հետ առավել ինտենսիվ աշխատանքներ տանել՝ նրանց մասնակցությամբ իրավախախտումները բացառելու համար:
Խոսք է գնացել նաև ոստիկանության կադրային քաղաքականության մասին: Ոստիկանության պետը նշել է, որ անհրաժեշտ է համակարգը համալրել բացառապես որակյալ կարդրերով:
Քաղաքացիներից դեռևս ստացվում են բողոքներ՝ կապված գիշերային ժամերին հրավառություններ կազմակերպելու հետ: Վալերիյ Օսիպյանը հանձնարարել է խիստ հսկողություն սահմանել այս ուղղությամբ:
Ճանապարհային ոստիկանությանը հանձնարարվել է առավել ինտենսիվ ծառայություն կազմակերպել մայրաքաղաքում՝ խցանումները բացառելու ուղղությամբ: Թեև ճանապարհատրանսպորտային պատահարների հետևանքով զոհերի ու վիրավորների թվի նվազում կա, այնուհանդերձ, ոստիկանության պետը հորդորել է չսահմանափակվել ձեռքբերվածով ու շարունակել միջոցառումները:
Ներկաների ուշադրությունը հրավիրվել է փետրվարի 17-ին հանրապետության մի շարք համայնքներում կայանալիք տեղական ինքնակառավարման մարմինների ընտրություններին: Այս ուղղությամբ խիստ կարգադրություն է տրվել՝ ապահովել պատշաճ ծառայություն:
Խորհրդակցության ավարտին ոստիկանության պետի տեղակալները մասնակիցների հետ քննարկել են Վալերիյ Օսիպյանի հանձնարարականների իրականացման ուղիներն ու միջոցները:
