Հանդես գալով զբոսաշրջային ընկերության անունից, հափշտակել է առանձնապես խոշոր չափերով գումար
ՀՀ քննչական կոմիտեի տեղեկացմամբ, հիշյալ կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում ավարտվել է Երևանի բնակչուհու կողմից խարդախությամբ առանձնապես խոշոր չափերով գումար հափշտակելու դեպքի առթիվ հարուցված քրեական գործի նախաքննությունը։ Վերջինիս մեղադրանք է առաջադրվել:
Քրեական գործով իրականացված բազմակողմանի քննության արդյունքում հիմնավորվել է, որ 2016թ. դեկտեմբերից մինչև 2018թ. Օգոստոս ժամանակահատվածում Երևանի բնակչուհին՝ ծնված 1967թ., հանդես գալով զբոսաշրջային գործունեություն իրականացնող ՓԲ ընկերության անունից, ԱՄՆ վիզա ստանալուն աջակցելու նպատակով, որպես դեպոզիտ գումար, տարբեր անձանցից պահանջել ու մաս-մաս ստացել է առանձնապես խոշոր չափերով գումար՝ նախապես պայմանավորվելով, որ նշված գումարը ԱՄՆ-ից հետ վերադառնալու գումարային երաշխիքն է, իսկ ԱՄՆ դեսպանատան կողմից վիզա չտրամադրելու դեպքում նշված գումարը ենթակա է վերադարձման: Սակայն, ԱՄՆ-ի դեսպանատունը մերժել է Միացյալ Նահանգների վիզայի տրամադրումը նշված քաղաքացիներին, իսկ 51-ամյա կինը չվերադարձնելով որպես երաշխիք իրեն վստահված առանձնապես խոշոր չափերի գումարները, յուրացրել է դրանք:
Քննությամբ ձեռք բերված տվյալների համաձայն, 51-ամյա կինը յուրացրել է նաև տարբեր քաղաքացիների կողմից Չինաստանի Ժողովրդական Հանրապետություն գումար փոխանցելու և այնտեղից ապրանքներ գնելու, ինչպես նաև Կանադայի վիզա ստանալուն աջակցելու նպատակով իրեն վստահված առանձնապես խոշոր չափերով գումարները:
Բացի դրանից, նույն ժամանակահատվածում 51-ամյա կինը տեղեկանալով մի շարք քաղաքացիների՝ ԱՄՆ-ի դեսպանատան կողմից մուտքի արտոնագիր ստանալու մերժման մասին, նախապես տեղյակ լինելով ԱՄՆ-ի դեսպանատան կողմից մերժման դիմումի վերանայման ընթացակարգի բացակայության մասին, խարդախությամբ առանձնապես խոշոր չափերով գումար հափշտակելու դիտավորությամբ, կրկին հանդես գալով նշված փակ բաժնետիրական ընկերության անունից, խաբեությամբ, վիզա տրամադրելու համար վերանայման դիմում կազմելու և նրանց վիզա տրամադրելու հարցը կարգավորելու պատրվակով ստացել ու խարդախությամբ հափշտակել է առանձնապես խոշոր չափերով գումարներ:
Ձեռք բերված բավարար ապացույցների համակցությամբ՝ Երևանի 51-ամյա բնակչուհուն մեղադրանք է առաջադրվել՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով (5 դրվագ), 178-րդ հոդվածի 2-րդ մասի 2-րդ կետով (2 դրվագ) և 178-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է կիրառվել կալանավորումը:
Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել է դատարան:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
