ՍԴ նախագահ Հրայր Թովմասյանին մեղադրանք է առաջադրվել. Ռուբեն Մելիքյան
«Իրավական ուղի» ՀԿ համահիմնադիր Ռուբեն Մելիքյանի տեղեկություններով՝ Սահմանադրական դատարանի նախագահ Հրայր Թովմասյանին մեղադրանք է առաջադրվել: Այս մասին նա ասաց ՍԴ բակում լրագրողների հետ ճեպազրույցում:
«Արդեն շատ ավելի հստակ է դառնում այս ամբողջ պրոցեսը՝ ՍԴ նախագահին մեղադրանք առաջադրելը՝ կամավորության մասին այդքան փողահարված օրենքից հետո (ՍԴ անդամների՝ վաղ կենսաթոշակի անցնելու օրենքի մասին): Եթե որևէ մեկը այս երկրում կարծում է, որ այս օրենքը, բոլոր գործընթացները և Հրայր Թովմասյանին մեղադրանք առաջադրելը պատճառական կապի մեջ չեն, դժվար է տրամաբանական համարել այս մոտեցումը»,-ասաց Մելիքյանը և հավելեց, որ ՍԴ նախագահ Հրայր Թովմասյանը որոշակի ժամանակահատված՝ մինչև նոր Սահմանադրության ուժի մեջ մտնելը, օժտված է եղել ընդհանուր անձեռնմխելիությամբ, պետք է հասկանալ՝ այն հետադարձ ուժ ունի՞, թե ոչ։
Ինչ վերաբերում է Հրայր Թովմասյանի անձեռնմխելիության հարցին, նա նշեց, որ գործող Սահմանադրությունը նախատեսում է գործառութային անձեռնմխելիություն:
«Հրայր Թովմասյանը Սահմանադրական դատարանի դատավորի կարգավիճակ ձեռք է բերել դեռ այն ժամանակ, երբ գործում էր նախորդ Սահմանադրությամբ ամրագրված ընդհանուր անձեռնմխելիության սկզբունքը, և շատ իրավաբաններ այն կարծիքին են, որ եթե անձը նույնիսկ մեկ օր օժտված է եղել ընդհանուր անձեռնմխելիությամբ, այն պետք է տարածվի ամբողջ ժամանակահատվածի համար»,-ասաց նա:
Ռուբեն Մելիքյանը նշեց, որ այս պատմության հետ կապված հետևանքները «Իմ քայլի» հետ նաև ՀՀ նախագահն է կիսում:
Հիշեցնենք՝ ՍԴ նախագահ Հրայր Թովմասյանը հարցաքննվում է, իսկ ՍԴ դատարանի բակում հավաքվել են մի խումբ մարդիկ՝ աջակցելու ՍԴ նախագահին։ Նշենք, որ դեռևս պարզ չէ՝ ինչ գործի շրջանակում է հարցաքննվում ՍԴ նախագահը։
Հիշեցնենք նաև, որ երեկ մամուլը գրել էր, ՀՔԾ-ը խուզարկություն է իրականացնում Սահմանադրական դատարանում: ՀՔԾ-ից հայտնել էին, որ ՀՔԾ քննիչը ՍԴ-ում խուզարկություն չի իրականացրել, այլ մանրամասներ չէին հայտնել:
