Մեղադրանքներ են առաջադրվել նորակոչիկներին տեղափոխող ավտոբուսի միջադեպի գործով
ՀՀ քննչական կոմիտեի տեղեկացմամբ, հիշյալ կոմիտեի ԶՔԳՎ չորրորդ կայազորային քննչական բաժնի վարույթում քննվող քրեական գործով ձեռնարկվում են անհրաժեշտ քննչական գործողություններ՝ նորակոչիկներին 2019թ․ հունվարի 8-ին ՀՀ ՊՆ Կոտայքի զինկոմիսարիատի Նաիրիի բաժանմունքից ՀՀ ՊՆ կենտրոնական հավաքակայան տեղափոխող «Պազ 32053» մակնիշի, ՊՆ 3299 Տ զինհամարանիշի ավտոբուսի եթևեկությանը խոչընդոտելու, այն կանգնեցնելու դեպքի բոլոր հանգամանքները պարզելու համար։
Ձեռք բերված ապացույցների հիման վրա՝ 1979թ. ծնված Գ. Հակոբյանին և 1996թ. ծնված Մ. Ոսկանյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով։
Գ. Հակոբյանի նկատմամբ որպես խափանման միջոց ընտրվել ստորագրություն չհեռանալու մասին, իսկ Մ. Ոսկանյանի նկատմամբ միջնորդություն է ներկայացվել դատարան՝ որպես խափանման միջոց կալանավորումն ընտրելու վերաբերյալ։
Քրեական գործով նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
