Հունաստանի Կալամատա քաղաքում Հայոց ցեղասպանության զոհերին նվիրված հուշարձան է բացվել
Հունաստանի Կալամատա քաղաքում Օսմանյան կայսրությունում Հայոց ցեղասպանության զոհերի հիշատակին նվիրված հուշարձան է տեղադրվել:
Հուշարձանի տեղադրման՝ տեղի հայ համայնքի խնդրանքը Կալամատայի քաղաքապետարանի կողմից հավանության է արժանացել։
Ermenihaber.am-ի տեղեկացմամբ, հուշարձանի բացման արարողությունը տեղի է ունեցել նոյեմբերի 17-ին՝ Հայ առաքելական եկեղեցու Հունաստանի թեմի առաջնորդ Գեղամ արքեպիսկոպոս Խաչերյանի մասնակցությամբ:
Հուշարձանի հիմքում տեղադրվել է Հայաստանից բերված խաչքար:
Բացման արարողությանը մասնակցել են հույն պաշտոնյաներ և պատգամավորներ, որին նախորդել էր Սուրբ Նիկոլայի մատուռում մատուցված պատարագը: Այդ մատուռը տեղի հայ համայնքին է տրամադրվում ժամերգություններ կատարելու համար: