Թե ինչպես «հեղափոխականներին» նախապես չեզոքացնել ինտերնետից
Այս տեղեկատվությունը հոկտեմբերի 14-ին տարածել է իրանական ISNA գործակալությունը, որը շատ մոտ է Իսլամական հեղափոխության Գերագույն առաջնորդ այաթոլլահ Սեյեդ Ալի Հոսեյնին Խամենեին: Սկզբում ուզում էի անտեսել․ ըստ էության, մենք և աշխարհն ինչ գործն ունենք Իրանի ԻՀՊԿ-ի հակահետախուզական հաջող գործողության հետ: Հետո լրջորեն մտորեցի: Ինչո՞վ էին զբաղված Հայաստանի հատուկ ծառայությունները, երբ մեր երկրում պետական հեղաշրջում էր նախապատրաստվում: Ըստ երևույթին, ոչինչով, ոչ ոքի չեն հետևել, ոչ ոք չստուգվել: Հետևաբար, Հայաստանի քաղաքացիների համար օգտակար կլինի սովորել, թե ինչպես վարվել դիվերսիոն տարրերի և օտարերկրյա հատուկ ծառայությունների վարձկանների հետ:
ԻՀՊԿ-ը հոկտեմբերի 14-ին պաշտոնապես հայտարարել է, որ բարդ հետախուզական գործողության ընթացքում ձերբակալվել է Telegram ինտերնետային ալիքում տեղակայված «Seday-e Mardom» ալիքի (նախկինում հայտնի որպես «Amad News») օպերատոր ոմն Ռուհոլահ Զամը: ԻՀՊԿ-ի հայտարարության մեջ ասվում է, որ Զամի ձերբակալությունը ցույց է տալիս, որ Իրանի թշնամիների հետախուզական ծառայությունները պարտվել են ԻՀՊԿ հետախուզական կազմակերպության հզորությանը, հայտնում է ISNA գործակալությունը: Ռ. Զամը «Amad News»-ը գործարկել է 2015-ին: Ալիքը հաճախ հրապարակում էր կեղծ լուրեր և կոչ էր անում բռնություն գործադրել Իսլամական Հանրապետությունը տապալելու նպատակով: 2018-ի դեկտեմբերին տեղի ունեցած բողոքի ցույցերի ժամանակ նա կոչ արեց մարդկանց զենք գործադրել կառավարության դեմ: Իր հայտարարության մեջ ԻՀՊԿ-ը նշել է, որ Ռ. Զամին հակահետախույզները Իրան են հասցրել «խելացի, բազմաչափ և նորարարական հնարքների» միջոցով, որոնք խաբեցին անգամ արտասահմանյան հետախուզական ծառայությունների մասնագետներին: Այդ հետախուզական ծառայություններն աջակցում էին Ռ. Զամին Իրանի հետ հոգեբանական պատերազմ հրահրելու գործում՝ երկրում, հատկապես երիտասարդ սերնդի համար տարաձայնություններ ստեղծելու նպատակով:
Հայտարարության մեջ ասվում է, որ Ռ. Զամի գործողություններն ուղղված էին Իրանում բռնի և ահաբեկչական գործողությունների համար հիմք ձևավորելուն: ԻՀՊԿ-ը նաև հայտարարել է, որ Ռ. Զամի գործունեության հետևում կանգնած է ֆրանսիական հատուկ ծառայությունը, որին աջակցում են նաև ԱՄՆ-ի և Սիոնիստական ռեժիմի (այսինքն՝ Իսրայելի) լրտեսական ծառայությունները: Դեռևս 2017-ի դեկտեմբերին Telegram ալիքը մարդկանց բռնության հրահրելու համար արգելափակել էր «Amad News»-ը՝ Իրանի կապի և տեղեկատվական տեխնոլոգիաների նախարար Մոհամադ Ջավադ Ազարի Ջահրոմիի հարցումով: «Telegram ալիքը կոչ է անում դրդել մարդկանց օգտագործել ինքնաշեն ռումբեր և զենք: Արդյո՞ք ժամանակը չէ դադարեցնել բռնության քարոզչությունը»,- ասել է Ազարի Ջահրոմին Twitter-ի իր էջում՝ նշելով Telegram- ի հիմնադիր Պավել Դուրովին՝ ամերիկամետ մարդու, որն ի դեպ, ՌԴ քաղաքացի էր: Ի պատասխան՝ Դուրովը Twitter-ում գրառում է կատարել. «Բռնությունների կոչերը արգելված են Telegram-ի կանոններով: Հաստատվելու դեպքում մենք ստիպված կլինենք արգելափակել այդպիսի ալիքը՝ անկախ դրա չափից և քաղաքական պատկանելությունից»: Հայտարարությանը հաջորդեց «Amad News» ալիքի արգելափակումը, որն այդ ժամանակ ուներ ավելի քան 1,3 միլիոն բաժանորդ:
Այնուամենայնիվ, Ռ. Զամը Իրանի հետ թշնամացած երկրների հատուկ ծառայությունների փողերով վերսկսեց իր գործունեությունը` գործարկելով «Seday-e Mardom» նոր ալիքը, որը թարգմանվում է որպես «ժողովրդի ձայն»: Հոկտեմբեր 14-ի իր վերջին հաղորդման մեջ, «Seday-e Mardom»-ը հաղորդեց ԻՀՊԿ պահակախմբի կողմից Ռուհոլահ Զամի ձերբակալության մասին: Գրառումը կցված է ԻՀՊԿ հետախուզական կազմակերպության գովազդային նյութին, որին հաջորդել է Իրանի Իսլամական Հանրապետության դրոշը, հայտնում է ամբողջ աշխարհին Կորպուսը: Ճիշտ այդ կերպ, դավաճան Ռ. Զամին Իրան բերելու և ձերբակալելու գործողության մասնակիցները ցույց տվեցին, որ ալիքն այժմ գտնվում է ԻՀՊԿ-ի վերահսկողության տակ:
Մեր հատուկ ծառայությունները դեռ շատ բան ունեն իրանցի գործընկերներից սովորելու, թե ինչպես պետք է ոչնչացնել արևմտյան երկրների գործակալական ցանցը…
Սերգեյ Շաքարյանց
