ՀՀ ԿԳՄՍ նախարարության «Գրքի և հրատարակչական գործի կենտրոն» ՊՈԱԿ-ում հափշտակության փաստի առթիվ քրեական գործ է հարուցվել

Պետական շահերի պաշտպանության հայց հարուցելու գործառույթի շրջանակներում ՀՀ գլխավոր դատախազությաւն պետական շահերի պաշտպանության վարչությունում ուսումնասիրության առարկա է դարձվել ՀՀ ֆինանսների նախարարության ֆինանսաբյուջետային վերահսկողության տեսչության կողմից ՀՀ կրթության, գիտության, մշակույթի և սպորտի նախարարության «Գրքի և հրատարակչական գործի կենտրոն» ՊՈԱԿ-ում իրականացված ստուգումների՝ ՀՀ գլխավոր դատախազություն ուղարկված արդյունքները: ՀՀ դատախազության լրատվական ծառայության տեղեկացմամբ, այդ նպատակով համապատասխան փաստաթղթեր են պահանջվել և ստացվել նաև ՀՀ կրթության, գիտության, մշակույթի և սպորտի նախարարությունից:

Ուսումնասիրությամբ պարզվել է, որ ՀՀ մշակույթի  նախարարության և ՊՈԱԿ-ի, ինչպես նաև «Հայաստան» համահայկական հիմնադրամի և ՊՈԱԿ-ի միջև 2014-2017 թթ. կնքված տարբեր պայմանագրերի կատարման արդյունքներով ՊՈԱԿ-ի կողմից ընդհանուր 1 182 200 դրամ գումար ենթակա է եղել վերականգնման ՀՀ պետական բյուջե: Ըստ նախնական տվյալների՝ կատարված ստուգման ընթացքում՝ 2017թ. ապրիլ-հուլիս ամիսներին և դրանից հետո նշված գումարները վերադարձվել են կազմակերպության դրամարկղ, սակայն չեն մուտքագրվել և փաստացի չեն վերադարձվել ՀՀ պետական բյուջե: Բացի դրանից, պարզվել է նաև, որ 2014-2017 թթ. առանց հիմնավորող փաստաթղթերի, որպես գործուղման, աշխատավարձի, արձակուրդի, գույքի վարձակալության և տրանսպորտային ծախսերի հատուցման գումար, վճարվել է 1 457 200 դրամ:

Այսինքն ՀՀ կրթության, գիտության, մշակույթի և սպորտի նախարարություն «Գրքի և հրատարակչական գործի կենտրոն» ՊՈԱԿ-ի պաշտոնատար անձինք, օգտագործելով իրենց պաշտոնեական դիրքը, առերևույթ յուրացրել են 2 639 400 դրամի չափով  իրենց վստահված ՀՀ պետական բյուջեի միջոցները:

Նկատի ունենալով, որ արձանագրված խախտումներն առերևույթ պարունակում են պաշտոնատար անձանց կողմից պաշտոնեական դիրքի օգտագործմամբ  իրենց վստահված պետական միջոցներից խոշոր չափերով հափշտակություն կատարելու հանցագործության հատկանիշներ՝  ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ՝ ՀՀ քրեական օրենսգրքի 179-րդ հոդվածի 2-րդ մասի 1-ին և 3-րդ կետերով: