Կոմիտաս Վարդապետը հավիտենության մեջ դրեց մեր երգը. Գարեգին Բ Ամենայն Հայոց Կաթողիկոսը՝ Կոմիտասի ծննդյան 150-ամյակին
Այսօր Ամենայն Հայոց Կաթողիկոսն այսօր այցելեց Կոմիտաս Վարդապետի շիրմին: Գարեգին Բ-ն իր շնորհավորական ուղերձ է հղել Կոմիտասի ծննդյան 150-ամյակի առթիվ:
«Գոհություն և փառք ենք մատուցում ամենակարող Աստծուն, որ նրա բարերար կամքով այսօր Կոմիտաս Վարդապետի 150-ամյա հոբելյանի շրջանակում առիթ ունենք ոգեկոչելու հայ երգարվեստի մեծագույն նվիրյալի հիշատակը: Նրա ամբողջ ներաշխարհը, հոգևոր և մտավոր ողջ էությունը, նրա կյանքն ու գործը կատարալապես արտահայտվում է սաղմոսերգերի փառաբանական խոսքերի մեջ: Իմ սիրտը պատրաստ է օրհներգելու և սաղմոս ասելու քեզ, իմ ողջ, իմ կյանք: Կոմիտաս Վարդապետն արդեն շուրջ մեկ դար իր հայրենագույն և սրբազան երգով հատել է ժամանակի և տարածության սահմանները՝ հայկական ինքնության արմատներից սնվող ու արդյունավորվող ստեղծագործությամբ դառնալով զրուցակիցը հայ և այլ ազգի յուրաքանչյուր երաժտասեր անձի հոգու ապրումներին: Քրիստոսասեր մեր ժողովրդի սրտից և հոգուց բխած երգի մեջ էր նա տեսնում մեր դարավոր ինքնությունը»,- ասաց կաթողիկոսը:
Նրա խոսքով՝ Կոմիտասը Աստծո եկեղեցու և հայրենիքի հանդեպ իր անսասան հավատով մաքրեց ու հայացրեց հայ երգը: Կոմիտաս Վարդապետը հավիտենության մեջ դրեց հայ երգը: Ցեղասպանության սարսափի մեջ անգամ դարձավ հայ ժողովրդի դարավոր լույսը և հոգու զրույցը Աստծո հետ:
«Մեծ վարդապետի ծննդյան հոբելյանական այս տարում նա հարգվում է ամենքիս առաջ, իբրև Աստծուն ուղղված ողջ հայության հառաչանքի ուղեկցող, անկեղծ աղոթքի և նորոգության խորհրդանիշ: Կոմիտասի սիրտն ամեն վայրկյան բաբախում էր Աստծուն և իր հայրենիքին ծառայելու ու փառաբանելու մղումով:
Այս մաղթանքով մեր հայցն ենք բարձրացնում առ Աստված, որ երկնային օթևաններում հավետ երանություն և խաղաղություն պարգևի մեր Կոմիտաս Վարդապետի լույս հոգուն: Մշտահունչ աղոթք և օրհնություն Կոմիտաս Վարդապետի անմահ ու մշտավառ հիշատակին»,- ամփոփեց Գարեգին Բ կաթողիկոսը:
