Սնկից կրկին թունավորումներ են գրանցվել․Առողջապահության նախարարությունը զգուշացնում է

Հուլիսի 2-ին, ժամը 2։30-ին «Մարտունու» բժշկական կենտրոն  են դիմել  Մարտունի քաղաքի նույն ընտանիքի 5 անդամ: ՀՀ աողջապահության  նախարարության լրատավական ծառայության տեղեկացմամբ, քաղաքացիները հոսպիտալացվել են վերակենդանացման բաժանմունք։

Հիվանդության վերհուշից ելնելով՝ ախտորոշվել  է «սուր էկզոգեն  թունավորում սնկից»:

Հիվանդները կերել են իրենց կողմից անտառից հավաքված, ըստ իրենց՝ «շամպինիոն» տեսակի սունկ:

Հիվանդներին ցուցաբերվել է անհրաժեշտ բժշկական օգնություն: Նրանցից երկուսը նույն օրը դուրս է գրվել, մյուսները գտնվում են ընդհանուր  բաժանմունքում, շարունակում են բուժումը: Վերջիններիս վիճակը գնահատվում է բավարար:

Սնկից թունավորումներից և հետագա բարդություններից խուսափելու նպատակով առողջապահության նախարարությունը կրկին զգուշացնում է.

սննդում չօգտագործել անհայտ ծագման սունկ,

չհավաքել սունկ ճանապարհների եզրերից,

ուտելի և թունավոր սունկը տարբերակելու համար հիմք չընդունել նկարները, քանի որ թունավոր սնկերը շատ հաճախ աճում են ուտելի սնկերի մոտ և կարող են արտաքին տեսքով շատ նման լինել,

սնկերը տարբերակելու համար հիմք չընդունել ժողովրդական առասպելները, ըստ որոնց թունավոր սնկերին չեն մոտենում միջատները և այլ կենդանիները կամ եփելու ընթացքում արծաթը սևանում է և սևացնում է սնկային արգանակը,

չուտել հում սունկ,

երեխաներին չկերակրել սնկով,

աղեստամոքսային համակարգի խնդիրներ ունեցող մարդկանց խորհորդ չի տրվում սննդում օգտագործել սունկ,

սնկի հետ չօգտագործել ալկոհոլ, քանի որ այն ակտիվացնում է մի շարք թունավոր նյութեր,

թարմ սնկերը 1 օրից ավելի չպահել`նույնիսկ սառնարանային պայմաններում,

չզբաղվել ինքնաբուժմամբ։