Ոստիկանները ձկնաբուծարանում զենք և թմրանյութ են հայտնաբերել
Օրերս ոստիկանները օպերատիվ տեղեկություններ էին ստացել, որ Արմավիրի մարզի Սիս համայնքի մի բնակիչ ձեռք է բերել գողացված ձկներ ու ձկան կերեր: ՀՀ ոստիկանության լրատվական ծառայության տեղեկացմամբ, հունիսի 10-ին ոստիկանության կազմակերպված հանցավորության դեմ պայքարի գլխավոր, Արմավիրի մարզային վարչությունների և Մասիսի բաժնի ծառայողները դատարանի որոշմամբ խուզարկություն են կատարել Սիս համայնքի մի ձկնաբուծարանում: Արդյունքում՝ պահեստարաններից երկուսում հայտնաբերվել են 44 պարկ տարբեր տեսակի ու քաշի ձկան կերեր:
Բացի դրանից, քարե շինության ննջասենյակից հայտնաբերվել է դեղնականաչավուն չորացված, մանրացված զանգվածներով 7 թղթե փաթեթներ և պոլիէթիլենային տոպրակի մեջ լցված դեղնականաչավուն սերմանման զանգված:
Նույն հասցեի կիսակառույց ջերմատնից հայտնաբերվել է կանեփի մշակված 47 թուփ:
Այս ամենից զատ, սեփականատերը Սիս գյուղի իր առանձնատնից ոստիկաններին է ներկայացրել ևս 15 փաթեթ՝ լցված դեղնականաչավուն չորացված, մանրացված զանգվածով և նույն զանգվածով տարա: Նա ներկայացրել է նաև մեկփողանի, 12 մմ տրամաչափերի, գործարանային համարներով երկու հրացան, ինքնաձիգ՝ իր փամփշտատուփով, 10 հատ փամփուշտ:
Ըստ ձնկաբուծարանի սեփականատիրոջ հայտարարության՝ փաթեթներում կանեփ թմրամիջոց է, ինքն է մշակել անձամբ օգտագործելու համար:
Սեփականատերը ակնհայտ հանցավոր ճանապարհով գույք ձեռք բերելու, ապօրինի թմրանյութ պահելու և օգտագործելու, ինչպես և ապօրինի զենք ու ռազմամթերք պահելու կասկածանքով բերման է ենթարկվել ոստիկանության Մասիսի բաժին:
Նշանակվել են փորձաքննություններ:
Կատարվում է քննություն: