Ահմադինեջադը ԱՄՆ-Իրան պատերազմի հնարավորություն առայժմ չի տեսնում
Իրանի և Միացյալ Նահանգների միջև հիմնական առճակատումը տնտեսական և քաղաքական դաշտերում է, և ներկայումս ռազմական առճակատման պատճառ չկա։ Այս մասին հայտարարել է Իրանի Իսլամական Հանրապետության նախկին նախագահ Մահմուդ Ահմադինեջադը (2005-2013):
«Ներկայում հիմնական պատերազմը տնտեսական և քաղաքական է, և կարծում եմ՝ ԱՄՆ-ը Իրանի դեմ պատերազմելու պատճառներ չունի»,- ասել է նախկին նախագահը «ՌԻԱ Նովոստիին» տված հարցազրույցում:
Նրա խոսքով, Վաշինգտոնը տնտեսական ճնշում է գործադրում Իրանի վրա և «միայն վերջում» այն կարող է վերաճել ռազմական գործողությունների:
«Այսինքն, եթե նրանք հասկանան, որ իրենց տնտեսական քաղաքականությունն ու քաղաքական ճնշումը արդյունք չեն տալիս, նրանք… կդիմեն զենքի: Ի՞նչ ունի ԱՄՆ-ը զենքից և դոլարից բացի»,- ասել է Ահմադինեջադը՝ միաժամանակ հավելելով, որ Իրանը բավականաչափ ուժեղ է:
Խոսելով երկրի տնտեսական վիճակի մասին, Ահմադինեջադը հայտարարել է, որ Վաշինգտոնը փորձում է առավելագույնս օգտագործել ներկայիս կառավարության պետական պլանավորման թերությունները՝ ճնշում գործադրելով թույլ կողմերի վրա, որպեսզի թուլացնի տնտեսությունը և «մեկ հպումով երկիրը կործանի»:
Այնուամենայնիվ, նախկին նախագահը հավելել է, որ Իրանը կարող է իր հարստությունն օգտագործելով` հաղթահարել նավթային կախվածությունը և այնպես անել, որ ԱՄՆ-ը չկարողանա ճնշում գործադրել Իրանի վրա:
«Եթե Իրանն օգտագործի իր հարստության մի մասը, ապա նա ընդհանրապես նավթի կարիք չի ունենա»,- ընդգծել է Ահմադինեջադը:
