Դիարբեքիրում կկայանա իսլամացված հայերի մասին ֆիլմի շնորհանդեսը
Հունիսի 16-ին տեղի կունենա Դիարբեքիրի Էղիլ շրջանի իսլամացած հայերի մասին պատմող «Թաքնված խաչ» վավերագրական ֆիլմի շնորհանդեսը: Ինչպես տեղեկացրել է Ermenihaber.am կայքը, լրագրող Ալթան Սանջարի ռեժիսորությամբ նկարահանված ֆիլմի պրեմիերան տեղի կունենա Դիարբեքիրի քաղաքապետարանի մշակույթի ու համաժողովների կենտրոնում:
Ֆիլմում ներկայացվում է, որ Էղիլը մինչև 1915 թվականը հայերով բնակեցված և հայկական մեծամասնությամբ շրջաններից մեկն էր Դիարբեքիրում: 1915-ին և դրանից հետո տեղի ունեցած կոտորածներից ու բռնագաղթից հետո հայկական մշակույթն ամբողջությամբ ջնջվել է այնտեղ, ողջ մնացած հայ երեխաներն ու մնացած ողջ հայ բնակչությունը մուսուլմանացվել:
Հասարակության կողմից «մուսուլմանացված հայեր» անվանվող բնակչության 1-ին և 2-րդ սերունդները շարունակում են ապրել իրենց ինքնությունից հեռացած: Էղիլում, որտեղ վերջին տարիներին իրականացվող ուսումնասիրությունների, հաղորդումների ու կոնֆերանսների արդյունքում շատացել են ինքնության փնտրտուքները, սկսել է ի հայտ գալ «հայկականության հանգամանքը»:
Երկու մասից բաղկացած ֆիլմի առաջին մասն ավելի շատ կենտրոնացել է 1915 թվականին այստեղ տեղի ունեցած կոտորածների վրա, իսկ 2-րդ մասը պատմում է ինքնության ճգնաժամի, տրավմաների ու փնտրտուքների մասին:
Լրագրողներ Ալթան Սանջարն ու Սերհաթ Թեմելի մեկ տարվա աշխատանքով նկարահանված ֆիլմը նպատակ ունի Թուրքիայի ժողովրդավարացման գործում մեծ կարևորություն ունեցող 1915-ի Հայոց ցեղասպանությունը օրակարգ բերելով, կազմակերպել այն առերեսումը, որը կանգնած է Թուրքիայի բոլոր ժողովուրդների առջև:
