Դուշանբեում քննարկվել են ԱՊՀ անվտանգության մարմինների փոխգործակցության հարցեր
ՀՀ ազգային անվտանգության ծառայության տնօրեն Ա.Վանեցյանի գլխավորած պատվիրակությունը ս.թ. մայիսի 21-ին մասնակցել է Դուշանբեում կայացած ԱՊՀ մասնակից պետությունների անվտանգության մարմինների և հատուկ ծառայությունների ղեկավարների խորհրդի 46-րդ նիստին: Այս մասին տեղեկացրել է ՀՀ ԱԱԾ լրատվական ծառայությունը։
ԱՊՀ մասնակից պետությունների անվտանգության մարմինների և հատուկ ծառայությունների պատվիրակությունների ղեկավարներին ընդունել է Տաջիկստանի Հանրապետության նախագահ՝ Էմոմալի Ռահմոնը:
Նիստի աշխատանքներին մասնակցել են նաև Բելառուսի Հանրապետության պետական անվտանգության կոմիտեի, Ղազախստանի Հանրապետության ազգային անվտանգության կոմիտեի, Ղրղզստանի Հանրապետության ազգային անվտանգության պետական կոմիտեի, Ռուսաստանի Դաշնության անվտանգության դաշնային ծառայության, Տաջիկստանի Հանրապետության ազգային անվտանգության պետական կոմիտեի, Ուզբեկստանի Հանրապետության պետական անվտանգության ծառայության պատվիրակությունները:
Որպես հրավիրվածներ՝ նիստին մասնակցել են ԱՊՀ գործադիր կոմիտեի, ԱՊՀ մասնակից պետությունների հակաահաբեկչական կենտրոնի, Ղազախստանի Հանրապետության և Ռուսաստանի Դաշնության արտաքին հետախուզության ծառայությունների պատվիրակությունները:
Նիստի ընթացքում քննարկվել են միջազգային ահաբեկչության, ծայրահեղականության, կազմակերպված հանցավորության դեմ պայքարում, ինչպես նաև հատուկ ծառայությունների գործունեության այլ համաձայնեցված ոլորտներում ԱՊՀ անվտանգության մարմինների փոխգործակցությանը վերաբերող արդի հարցեր: Քննարկումների արդյունքում ընդունվել է մի շարք որոշումներ, ստորագրվել են համապատասխան փաստաթղթեր:
