Նոր հրատարակություններ՝ Մայր Աթոռ Սուրբ Էջմիածնից

Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնի Հրատարակչական բաժինը լույս է ընծայել Մկրտիչ Ա Խրիմյան Ամենայն Հայոց Կաթողիկոսի «Դրախտի ընտանիք», «Պապիկ և Թոռնիկ», «Սիրաք և Սամուել» բարոյախրատական երկերի ժողովածուն և գրող, հրապարախոս Ռազմիկ Դավոյանի «Համատարած Թումանյան» մենագրությունը:

Խրիմյան Հայրիկի երկերի ժողովածուն, որ տպագրվում է Նորին Սրբություն Գարեգին Բ Ամենայն Հայոց Հայրապետի կողմից 2019 թվականն Ընտանիքի տարի հռչակելու առիթով, հորդորներ ու խրատներ է տալիս հայ երիտասարդին` քրիստոնեական արժեքներով և սկզբունքներով ամուր ընտանիք կազմելու համար, բարոյախրատական դասեր բովանդակում` աշխարհի, մարդու, նրա կոչման, հասարակական կյանքում ունեցած պարտականությունների և իրավունքների մասին: Գիրքը արևելահայերենի են  փոխադրել Ա. Մադոյանն ու Վ. Պարանյանը:

Հովհաննես Թումանյանի ծննդյան 150-ամյակի առիթով հրատարակված Ռ. Դավոյանի «Համատարած Թումանյան» աշխատությունը նվիրված է բանաստեղծի՝ հայ մարդ-անհատ և հայ հասարակություն կերտելու կամովին ստանձնած առաքելությանը: Մենագրության մեջ ոչ մեծ, բայց կարևոր մի բաժին է հատկացված նաև Թումանյանի և Նարեկացու ստեղծագործական ու գաղափարական առնչություններին:

Գրքերը հրատարակվել են «Սարգիս Գաբրիելյան» հիմնադրամի մեկենասությամբ:

Մայր Աթոռ Սուրբ Էջմիածնի Տեղեկատվական համակարգ