Ավանում առնվազն 20 կրակոց արձակած երիտասարդը բերման ենթարկվելիս ոտքի հարվածով կոտրել է ոստիկանության մեքենայի ապակին

ՀՀ ոստիկանության տեղեկացմամբ, դեկտեմբերի 23-ին, ժամը 21.20-ին ոստիկանության Նոր Նորքի բաժնում հաղորդում է ստացվել, որ Ավանի 14-րդ փողոցի տներից մեկի վրա մի մարդ ինքնաձիգով կրակում է:

Մեկնած օպերատիվ խումբը պարզել է, որ 1986 թ. ծնված Վահրամ Մանվելյանն իրեն ամրակցված «MR 43» տիպի, 12 տրամաչափի երկփողանի ողորկափող որսորդական հրացանից նույն օրը, ժամը 21:15-ին կրակել է նշված տան ուղղությամբ, հայհոյել: 1950 թ. ծնված Հենրիկ Ն.-ն դիտողություն է արել Վ. Մանվելյանին, նա էլ դիտավորությամբ նշված հրացանից կրակել է Հենրիկ Ն.-ի ոտքերին, որը ժամը 22.00-ին «զույգ ստորին վերջույթների բազմաբեկոր հրազենային վնասվածք» ախտորոշմամբ տեղափոխվել է հիվանդանոց:

Ժամը 21:45-ին Վահրամ Մանվելյանը դեպքի վայրից բերման է ենթարկվել, որի ընթացքում ոտքով հարվածել և դիտավորությամբ կոտրել է ՊՊԾ թիվ 29 պարեկային ավտոմեքենայի դռան ապակին:

Դեպքի վայրից հայտնաբերվել է 20 պարկուճ: Հանցագործության գործիք հրացանն առգրավված է: Վահրամ Մանվելյանը ձերբակալվել է: Նշանակվել են ԴԲՓ, դատաձգաբանական, դատաքիմիական և դատակենսաբանական փորձաքննություններ: Կատարվում է նախաքննություն: