Սա տնտեսական որոշում չէ, սա «մերոնքականներին» կաշառելու ձև է․ Հրանտ Բագրատյանը՝ իշխանության նախաձեռնության մասին
ՀՀ նախկին վարչապետ Հրանտ Բագրատյանն անդրադառնալով կառավարություն վերջին նախաձեռնություններին՝ գրել է․
«Ամեն օր արթնանում ենք ու կարդում փաշինյանական հերթական անհեթեթ որոշումները։ Այս անգամ նա որոշել է մինչև 1 մլն վարկերը փակել… բյուջեի հաշվին։ Լսեք, բյուջեն բոլորինս է՝ հանրությանը. ձեզ ո՞վ է իրավունք տվել վերցնել մի հատուկ սոցիալական խավ (մինչև 1 մլն դրամը հիմնականում իշխանությանը մոտ կանգնած մարդկանց խավն է) և հանրային միջոցները ծախսել դրանց բարեկեցության վրա։ Սա տնտեսական որոշում չէ, սա «մերոնքականներին» (իմա ՔՊ-ական հակում ունեցողներին) կաշառելու ձև է։ Սա նախընտրական կաշառք է իր բոլոր հետևանքներով։ Վարկերի ավելի քան 95%-ը, համաձայն ԿԲ-ի, վերադարձվում են։ Էլ ի՞նչ կարիք կա դրանք վերադարձելիությունը դարձնել ավելի քան 100%։ Քի՞չ է, երբ բանկերն այս երկրում առանց այդ էլ գերշահութաբեր են, քաղցկեղի նման չեն թողնում, որ իրենցից բացի ուրիշ բան զարգանա։ Ուրեմն ի՞նչ. բանկերին հերթական բյուջետային խաչաձև սուբսիդիայի հե՞տ գործ ունենք։ Սա ի՞նչ տրամաբանություն է։ Բյուջեում փո՞ղ ունեք՝ ամրապնդեք երկրի անվտանգությունը, պաշտպանությունը, բարձրացրեք կենսաթոշակներն ու պետական աշխատավարձերը, ֆինանսավորեք կրթությունն ու առողջապահությունը։ Ի՞նչ վարկերի սուբսիդավորում, ի՞նչ հիպոթեք բյուջեի հաշվին, ի՞նչ կուտակային կենսաթոշակ 40 տարով»,- գրել է նա։
Նշենք, որ կառավարության նոր նախաձեռնության միջոցով առաջարկվում է մինչև մեկ միլիոն անհուսալի դասակարգված վարկ ունեցող քաղաքացիներին գրանցված աշխատանքի եկամտահարկի և որոշակի վճարումների միջոցով մարել վարկի մայր գումարը՝ առանց տույժ-տուգանքի:
