Մեկնարկել է G20-ի պատմության մեջ առաջին վիրտուալ գագաթնաժողովը
Մեկնարկել է «Մեծ քսանյակի» պատմության մեջ առաջին վիրտուալ գագաթնաժողովը, որը նվիրված է կորոնավիրուսի դեմ պայքարին ուղղված միջոցառումներին: Այս մասին տեղեկացրել է «ՌԻԱ Նովոստին»
Այս տարի G20-ը նախագահում է Սաուդյան Արաբիան, և գագաթնաժողովի բացումն արել է սաուդացի թագավոր Սալման բին Աբդել Ազիզ Ալ-Սաուդը, իսկ համաշխարհային մյուս առաջնորդները թագավորի խոսքին հետևել են իրենց աշխատասենյակներից էկրանների օգնությամբ:
«Մեր հանդիպումն անցկացնում ենք՝ ցույց տալով մեր՝ աշխարհի խոշորագույն տնտեսությունների ղեկավարների պատասխանատվությունը կորոնավիրուսի համավարակին դիմագրավելու հարցում, ինչը պահանջում է վճռական միջոցների ձեռնարկում տարբեր մակարդակներով»,- ասել է Սաուդյան Արաբիայի թագավորը:
ՌԴ ղեկավար Վլադիմիր Պուտինը ևս միացել է տեսահամաժողովին իր մերձմոսկովյան նստավայրից: Գագաթնաժողովին միացել են նաև Իսպանիայի, Հորդանանի, Սինգապուրի, Շվեյցարիայի ղեկավարները:
Գագաթնաժողովում միջազգային կազմակերպությունները ներկայացնում են ՄԱԿ-ը, ԱՀԿ-ն, Առևտրի համաշխարհային կազմակերպությունը, Պարենի և գյուղատնտեսության կազմակերպությունը, Համաշխարհային բանկի խումբը, ԱՄՀ-ը:
Արտահերթ գագաթնաժողովի գլխավոր թեման է COVID-19 կորոնավիրուսի համավարակն ու դրա ազդեցությունը համաշխարհային տնտեսության վրա:
Վերջին տվյալների համաձայն՝ կորոնավիրուսով հիվանդների թիվը ողջ աշխարհում գերազանցել է 480 000-ը, մահացածներինը՝ 22 000-ը:
