Թուրքիան վերածվում է ծովահենային պետության․ Կիպրոսի նախագահ
Կիպրոսը քննադատում է Թուրքիայի ապօրինի գործողությունները Կիպրոսի բացառիկ տնտեսական գոտում:
Կիպրոսի նախագահ Նիկոս Անաստասիադիսը հայտարարել է, որ Թուրքիան վերածվում է ծովահենային պետության, այն բանից հետո, երբ Թուրքիան հայտնել է Կիպրոսի ջրեր նոր հորատող նավ ուղարկելու ծրագրերի մասին: Այս մասին, հայտնում է «Cyprus Mail»-ը:
«Արևելյան Միջերկրական ծովում Թուրքիան վերածվում է ծովահենային պետության: Չնայած էներգետիկ փոխգործակցությանը, որն ստեղծվել էր տարածաշրջանում, Թուրքիան պնդում է միջազգային անօրինության ուղու մասին»,- նշված է Կիպրոսի նախագահի հայտարարության մեջ:
Ինչպես գրում է regionmonitor-ը, Կիպրոսը և Հունաստանը վիճարկում են տարածաշրջանում Թուրքիայի հավակնությունները: Թուրքիան պնդում է, որ միջազգայնորեն ճանաչված Կիպրոսի կառավարության՝ գազի և նավթի որոնման փորձերը թուրք կիպրոսցիների իրավունքների խախտում են:
Թուրքիայի էներգետիկայի և բնական պաշարների նախարար Ֆաթիհ Դյոնմեզն ավելի վաղ հայտարարել էր, որ «Yavuz» հորատման նավը տեղակայվելու է Կիպրոսում` հորատման աշխատանքներ իրականացնելու համար:
Եվրահանձնաժողովում արտասահմանյան գործերով ներկայացուցիչ Պիտեր Ստանոն նույնպես դատապարտել է Թուրքիայի ծրագրերը՝ հայտարարելով, որ այս քայլը խախտել է երկխոսության պայմանները:
«Բարեխիղճ միջավայրի ստեղծման կոնկրետ քայլեր են անհրաժեշտ, որոնք կնպաստեն երկխոսությանը: Ավելի ընդարձակ շրջանում Թուրքիայի` որոնողական և հորատման աշխատանքներ սկսելու մտադրությունը, ցավոք, ընթանում է հակառակ ուղղությամբ»,- ասել է Ստանոն:
