Քուրդիստանի մայրաքաղաք Էրբիլում օծվեց առաջին հայկական եկեղեցին (լուսանկարներ)
Ապրիլի 6-ին, Ս. Մարիամ Աստվածածնի Ավետման տոնի նախօրյակին Իրաքյան Քուրդիստանի մայրաքաղաք Էրբիլի Այնքավա շրջանում բացվեց և կատարվեց նորակառույց Հայկական Առաքելական Սուրբ Խաչ եկեղեցու օծումը, որն առաջինն է քաղաքում:
«Հայերն այսօր»-ի տեղեկացմամբ, եկեղեցու օծման կարգը կատարել է Իրաքի Հայոց թեմի առաջնորդ Տեր Ավագ արք. Ասատուրյանը: Արարողությանը մասնակցել են Անթիլիասի միաբանության անդամ Վարուժան արք. Հերկելյանը, Եգիպտոսի Հայոց թեմի առաջնորդ Աշոտ եպս. Մնացականյանը, Դամասկոսի Հայոց թեմի առաջնորդ Տ. Արմաշ եպս. Նալբանդյանը, Ֆրանիսայի Հայոց թեմի առաջնորդ Տ. Վահան եպս. Հովհաննիսյանը, Ռումինիայի Հայոց թեմի առաջնորդ Տ. Տաթև եպս. Հակոբյանը, Էջմիածինի Գևորգյան ճեմարանի տեսուչ Գարեգին վարդապետ Համբարձումյանը և Իրաքի թեմում ծառայող հոգևորականներ:
Եկեղեցու բացման արարողությանը ներկա են եղել նաև Իրաքում ՀՀ արտակարգ և լիազոր դեսպան Հրաչյա Փոլադյանը, Իրաքում կրոնական համայնքների առաջնորդներ, Քուրդիստանի կառավարության ներկայացուցիչներ, Իրաքի կենտրոնական վարչության, շրջանների թաղական խուրհուրդների անդամներ և հավատացյալ հոծ բազմություն:
Հավելենք, որ եկեղեցու կառուցման համար հողահատկացումը և ֆինանսավորումը իրականացվել է Ինքնավարության նախկին նախագահ Մասուդ Բարզանիի (Masoud Barzani ) կառավարության կողմից։
