Ո՞վ է պատասխանատու Արմավիրի մայր ջրանցքը կոյուղաջրերից մաքրելու համար
«ԷկոԼուրի» (https://www.ecolur.org/hy/news/sos/–/10918/ ) տեղեկացմամբ, Արմավիրի մարզում Բաղրամյան և Մյասնիկյան համայնքների կոյուղաջրերը լցվում են Արմավիրի ջրանցք։ «ԷկոԼուրի» ահազանգին ի պատասխան, Ջրային կոմիտեից հայտնել են, որ Բաղրամյան և Մյասնիկյան համայնքները «Վեոլիա ջուր» ընկերության բաժանորդ չեն և համայնքապետարաններն իրենք են զբաղվում ջրամատակարարման և ջրահեռացման հարցերով: Միևնույն ժամանակ, այս համայնքները պայմանագիր ունեն «Վեոլիա ջուր» ընկերության հետ, որի համաձայն վթարային իրավիճակներում պետք է դիմեն «Վեոլիա ջրին»՝ վճարովի հիմունքներով վթարները վերացնելու համար:
Ջրային կոմիտեից հայտնել են նաև, որ արդեն ավարտվել են Արմավիր և Մեծամոր քաղաքների համար մաքրման կայանի նախագծման աշխատանքները և մեկնարկում է կայանի շինարարությունը: Մաքրման կայանի կառուցումը կլուծի կոյուղաջրերի խնդիրը:
«Վեոլիա ջուր» ընկերության մամուլի խոսնակ Մուրադ Սարգսյանը «ԷկոԼուրի» հետ զրույցում նշել է, որ ընկերությունը պատասխանատու չէ նշված համայնքներում կոյուղաջրերի հեռացման համար:
«Մենք այդ համայնքներում պատասխանատու ենք ջրի համար, բայց կոյուղի այնտեղ չունենք, դրանք համայնքապետարաններն են սպասարկում,- ասել է Մուրադ Սարգսյանը:- Ես չգիտեմ՝ դիմել են մեզ, չեն դիմել: Եթե դիմեն, ասեն՝ վթար է եղել, գուցե գնանք, օգնենք: Թող իրենք ասեն՝ դիմել են, չեն դիմել, հնարավոր չէ՝ մերը լինեն, վթար լինի, չգնանք վթարը վերացնենք:
Այնտեղ կոյուղաջրերը գնալու տեղ չունեն, մաքրման կայան չկան: Կոյուղաջրերի մաքրման կայաններ Հայաստանում շատ քիչ կան, շատ բնակավայրեր կոյուղաջերի հեռացում ունեն, բայց մաքրում չունեն:
355 բնակավայր ենք սպասարկում, նաև որոշ տեղեր կոյուղի կա, որը մեզ հանձնվել է վարձակալության, բայց այս գյուղերը մեր չեն: Մենք կոյուղին հեռացնում ենք այնտեղ, որտեղ պետությունը նախատեսել է, բայց մաքրումը Հայաստանում խնդրահարույց է: Բայց դա «Վեոլիայի» խնդիրը չէ, դա Ջրային կոմիտեի խնդիրն է:
Եթե ասում են՝ եկեք, մեր կոյուղատար համակարգը վերցրեք, շահագործեք, մենք դրա կարիքը չունենք, դա պետք է դիմեն Ջրային կոմիտեին, որպես հայկական կողմի ներկայացուցիչ, այդ հարցերն այնտեղ լուծեն: Մենք ֆրանսիական ընկերություն ենք, ինչ տվել են, նա էլ շահագործում ենք, ինչ չենք ստացել, չենք կարող շահագործել, որևէ բանի համար պատասխանատու չենք: Բոլոր հարցերը պետք է լուծվեն գյուղապետարան, մարզպետարան, Ջրային կոմիտե հարթության վրա, որովհետև դրանք հայկական կողմն են, մենք՝ ֆրանսիական կողմն ենք, վարձակալել ենք, պետությանը դրա համար վճարում ենք շատ մեծ գումար և սպասարկում ենք»։
ԷկոԼուրի հետ զրույցում Մյասնիկյանի համայնքապետ Տիգրան Բաղդասարյանը նշել է, որ խնդիրը միշտ եղել է և կլինի այնքան ժամանակ, քանի դեռ չի կառուցվել մաքրման կայան:
«60 տարի է՝ Բաղրամյանի և Մյասնիկյանի կոյուղաջրերը լցվում են Արմավիրի մայր ջրանցք,-ասել է Տիգրան Բաղդասարյանը և հավելել,-ուրիշ թափվելու տեղ չունեն: Մաքրման կայան չունենք: Դիմել էինք, հարցն ընթացքի մեջ էր, ծրագիր էր մշակվել, որ պետք է կառավարությունը մաքրման կայան կառուցեր, բայց էս խառնաշփոթը սկսվեց, էդպես մնաց: «Վեոլիան» միայն խմելու ջուրն է սպասարկում, կոյուղաջրերի համար չունենք պայմանագիր կնքված: Նորից կբարձրացնենք հարցը»:
Իսկ ահա Բաղրամյանի համայնքապետ Արա Սահարյանը հերքել է, որ համայնքի կոյուղաջրերը լցվում են Արմավիրի մայր ջրանցք: «Բաղրամյանի կոյուղագիծն ընդհանրապես չի հասնում այդ գծին, մեզ հետ դա կապ չունի,- ասել էԱրա Սահարյանը։- Մերը գալիս, իջնում է գետնի տակ, կորում է: Մենք «Վեոլիա ջուր» ընկերության հետ պայմանագիր ունենք, գալիս, մաքրում են կոյուղաջրերը, ոչ մեկի դաշտ չի լցվում, ոչ մի փողոց չի լցվում: Մոտ մեկ ամիս առաջ ենք պայմանագիր կնքել, մի 10 օր առաջ էլ մեքենան եկել, մաքրել, գնացել է»:
