Վարկային կազմակերպության մասնաճյուղի կառավարիչը խարդախությամբ հափշտակել է մոտ 1 000 000 դոլար (տեսանյութ)
ՀՀ ոստիկանության կազմակերպված հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչության և քրեական հետախուզության գլխավոր վարչության ծառայողների համատեղ միջոցառումների շնորհիվ պարզվել է, որ «Փարվանա-Կրեդիտ» ունիվերսալ վարկային կազմակերպության Սևանի մասնաճյուղի կառավարիչ Վահրամ Ղազարյանը 2015-2018 թթ․ չարաշահելով շուրջ 40-50 անձանց վստահությունը, խաբեությամբ, ձևական կնքելով փոխառության պայմանագրեր, վարկային կազմակերպությունում ավանդ ձևակերպելու պատրվակով ստացել և խարդախությամբ հափշտակել է մոտ 1 000 000 դոլար՝ խոստանալով ամսական ապահովել տարբեր չափերի եկամտաբերություն:
ՀՀ ոստիկանության լրատվական ծառայության տեղեկացմամբ, պարզվել է նաև, որ 2018-2019 թթ․նա մի շարք քաղաքացիների անուններով կնքելով գրավի կեղծ պայմանագրեր և վարկային կազմակերպության ծրագիր մուտքագրելով իրականությանը չհամապատասխանող տվյալներ, իրեն վստահված «Փարվանա-Կրեդիտ» ունիվերսալ վարկային կազմակերպության Սևանի մասնաճյուղի դրամարկղից յուրացրել է ավելի քան 8 000 000 դրամ:
ՀՀ ոստիկանության կազմակերպված հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունում նախապատրաստված նյութերով հարուցվել է քրեական գործ՝ խարդախությամբ և յուրացման եղանակով առանձնապես խոշոր չափերով գույք հափշտակելու, ինչպես և փաստաթղթեր կեղծելու և օգտագործելու հատկանիշներով:
Քրեական գործն ուղարկվել է ՀՀ քննչական կոմիտե՝ նախաքննության համար:
Կասկածներ կան, որ Վահրամ Ղազարյանի գործունեությունից հնարավոր է տուժած լինեն այլ քաղաքացիներ ևս, որոնք կարող են դիմել ոստիկանության Սևանի կամ մոտակա բաժին:
