ՍԴ նախագահ Հրայր Թովմասյանը վաղը ժամը 10:30-ին կհարցաքննվի. Ամրամ Մակինյան
ՍԴ նախագահ Հրայր Թովմասյանը վաղը ժամը 10:30-ին կհարցաքննվի: Այս մասին Tert.am-ի հետ զրույցում ասել է Հրայր Թովմասյանի փաստաբան Ամրամ Մակինյանը. «Վաղը ժամը 10:30 Հատուկ քննչական ծառայության քննիչը պարոն Թովմասյանի հետ կապված քննչական գործողություն է կատարվելու, հարցաքննություն է տեղի ունենալու»:
Հարցին, թե ՍԴ նախագահին հարցաքննելու ընթացակարգը պահպանվո՞ւմ է, Արման Մակինյանն ասել է. «Ուրեմն, «Սահմանադրական դատարանի» մասին սահմանադրական օրենքը կարգավորում է ընթացակարգերը, նախապես հայտնում են հարցաքննության անհրաժեշտության մասին, ընտրվում է հարցաքննության համար վայր և ժամ, այդ հարցերը համաձայնեցված են»:
Հիշեցնենք, որ մամուլում տեղեկություններ տարածվեցին, որ ՀՔԾ-ն խուզարկություն է իրականացնում Սահմանադրական դատարանում: ՀՔԾ-ից, սակայն, լուրը ժխտել են, նշելով, որ խուզարկություն չի իրականացվել, այլ մանրամասներ չեն հայտնել:
