Թրամփի վարչակազմի դիրքորոշումը Հայոց ցեղասպանության վերաբերյալ չի փոխվել․ ԱՄՆ պետքարտուղարություն
ԱՄՆ պետքարտուղարությունը պաշտոնապես արձագանքել է Սենատում Հայոց ցեղասպանության ճանաչման բանաձևին: Պետքարտուղարության պաշտոնական կայքում նշված է, որ այդ հարցի նկատմամբ ԱՄՆ նախագահ Դոնալդ Թրամփի վարչակազմի դիրքորոշումը չի փոխվել: Գրում է Ermenihaber.am-ը։
«Մեր հայացքներն արտացոլված են սույն թվականի ապրիլին ԱՄՆ նախագահի կողմից հնչած ուղերձում»,- նշված է հայտարարությունում:
2019թ. ապրիլի 24-ին ԱՄՆ նախագահ Դոնալդ Թրամփը Հայոց ցեղասպանության 104-րդ տարելիցի կապակցությամբ հղած իր ցավակցական ուղերձում օգտագործել էր «Մեծ եղեռն» եզրույթը.
«Այսօր մենք ոգեկոչում ենք Մեծ եղեռնն ու բոլոր նրանց հիշատակը, ովքեր տառապել են 20-րդ դարի ամենասարսափելի զանգվածային կոտորածների պատճառով: 1915 թվականից սկսած Օսմանյան կայսրության վերջին տարիներին մեկուկես միլիոն հայեր աքսորվեցին, սպանվեցին կամ մահվան երթի դուրս եկան…
Մենք խոստանում ենք սովորել նախկին ողբերգություններից, որպեսզի չկրկնենք դրանք: Մենք ողջունում ենք հայերի ու թուրքերի ջանքերը՝ ճանաչելու և հաշվի առնելու իրենց ցավալի պատմությունը: Մենք կանգնում ենք հայ ժողովրդի կողքին՝ հիշելու Մեծ եղեռնի ընթացքում կորսված կյանքերն ու վերահաստատելու ավելի խաղաղ աշխարհ կառուցելու մեր հանձնառությունը»:
Նշենք, որ դեկտեմբերի 12-ին ԱՄՆ սենատը միաձայն ընդունել էր Հայոց ցեղասպանությունը ճանաչող բանաձև։ Իսկ ավելի վաղ` հոկտեմբերի 29-ին ԱՄՆ կոնգրեսի ներկայացուցիչների պալատն էր ընդունել Ցեղասպանությունը ճանաչող բանաձև:
