Ես ամեն կերպ կողմ եմ, որպեսզի ղարաբաղյան համայնքների միջև շփումները վերականգնվեն․ Լավրով
Այսօր Բաքվում Ադրբեջանի ԱԳ նախարար Էլմար Մամեդյարովի հետ համատեղ ասուլիսում ՌԴ ԱԳ նախարար Սերգեյ Լավրովը՝ գնահատելով Երևան-Ստեփանակերտ-Բաքու լրագրողական փոխայցերը, նշեց, որ Ռուսաստանն այդ նախաձեռնության հեղինակներից է, քանի որ այս տարեսկզբին Վիեննայի գագաթնաժողովից հետո Մոսկվայում հանդիպում եղավ Ադրբեջանի, Հայաստանի և Ռուսաստանի ԱԳ նախարարների մակարդակով, ԵԱՀԿ ՄԽ համանախագահների մասնակցությամբ, որտեղ համաձայնեցվեց ոչ պաշտոնական, բայց կոնկրետ թուղթ այն մասին, որ բոլորը կողմ են արտահայտվում հումանիտար փոխանակումներին:
«Դա վերաբերում է զոհերի խնդիրները լուծելուն, ազատազրկվածներին, այնտեղ կար հիշատակում նաև լրագրողների մասին, այսինքն՝ շփումներ մարդկանց միջև: Ես կարծում եմ, որ դա չափազանց կարևոր է, քանի որ ցանկացած լուծում պետք է ընդունված լինի մարդկանց կողմից, որոնք ապրում են այդ հողի վրա և որոնք ապրում են Ադրբեջանում, Հայաստանում և Ղարաբաղում: Որքան սերտ մարդիկ շփվեն միմյանց հետ, և որքան օբյեկտիվ լրագրողները լուսաբանեն այն, ինչ տեղի է ունենում շփման գծի երկու կողմերում, ավելի հեշտ, կայուն կլինեն այն պայմանավորվածությունները, որոնց մենք հույս ունենք հասնել»,- ասաց Լավրովը:
Պատասխանելով ադրբեջանցի լրագրողի հարցին, թե որքանո՞վ օգտակար կլիներ հակամարտության կարգավորման գործընթացում հանդիպումը, նրա ձևակերպմամբ, Ղարաբաղի հայկական և ադրբեջանական համայնքների միջև, Լավրովը նշեց.
«Ես ամեն կերպ կողմ եմ, որպեսզի ղարաբաղյան համայնքների միջև շփումները, որոնք, ի դեպ, որոշակի փուլում տեղի են ունեցել, ապա սառեցվել են, վերականգնվեն: Դա չափազանց հեռանկարային թեմա է, քանի որ արդյունքում՝ ամեն դեպքում, Լեռնային Ղարաբաղի ողջ բնակչությունը պետք է կողմնորոշվի, թե ինչպես ապրի հետագայում»:
