Իրանը վերականգնում է կարգուկանոնը երկրում. դավաճաններն ու վարձկանները կստանան այն, ինչին արժանի են
Նոյեմբերի 17-ին թշնամիների գրոհները ճնշելուց հետո ամբողջ շաբաթվա ընթացքում Իրանում ինտենսիվորեն գործարկվում է պատասխան գործողությունների մեխանիզմը: Իսլամական հեղափոխության պահապանների կորպուսի (ԻՀՊԿ) ներկայացուցիչ, բրիգադի գեներալ Ռամադան Շարիֆը նոյեմբերի 24-ին հայտարարել է, որ երկրում ձերբակալվել են իշխանությունների և մարդկանց դեմ բողոքի ցույցերի և զինված հարձակումների բոլոր առաջնորդները: ԻՀՊԿ ներկայացուցչի խոսքերով՝ բողոքի ցույցերը կազմակերպվել են արգելված, այդ թվում՝ անջատողական խմբավորումների կողմից, որոնք օգտվել են երկրի մի խումբ քաղաքացիների դժգոհությունից: Ընդ որում, Շարիֆը չի բացառում, որ ցուցարարների հետևում կարող էին կանգնել շահ Փեհլևիի ընտանիքի անդամները, որոնք ղեկավարում էին Իրանում մինչև 1979 թվականը: ԻՀՊԿ-ն բողոքի ակցիաների հրահրողների զանգվածային ձերբակալություններ է իրականացրել Ալբորզ, Ֆարս, Թեհրանի և Խուզեստան նահանգներում։ Ըստ գեներալի խոսքերի՝ ձերբակալվածների թիվը հասնում է հարյուրների, ընդ որում նրանց մեծ մասը կապեր ունի օտարերկրյա հատուկ ծառայությունների հետ: «Իրանում, որը հաջողությամբ դիմանում է պատժամիջոցների ճնշմանը, թշնամիները պատրաստել են գլխակերների՝ անկարգություններ հրահրելու նպատակով»,- նշել է Ռամզան Շարիֆը: Նա շեշտել է, որ Իրանի 750 քաղաքներից զանգվածային բողոքի ցույցեր են անցկացվել առնվազն 100-ում, բայց դրանք ավարտվել են սկսվելուց հետո ոչ ավելի, քան երեք օրվա ընթացքում: Նրա կարծիքով, այս փաստը վկայում է ցուցարարներին ժողովրդական աջակցության բացակայության մասին:
Նույն օրը Քերմանշահ օստանի (նահանգի) նահանգապետ Հուշանգ Բազվանդը հայտարարել է, որ երկրում վերջերս տեղի ունեցած բողոքի ցույցերի ընթացքում ձերբակալվել են ահաբեկչական խմբավորումների («Իսլամական պետություն» (ԻՊ), Մուջահիդին-էլ-Հալք (MEK) և «Ազատ կյանք Քրդստանում» (PJAK) կուսակցություն) բազմաթիվ ներկայացուցիչներ: Այդ մասին հայտնել է իրանական Mehr News տեղեկատվական գործակալությունը: Իրանում բոլոր երեք ահաբեկչական խմբավորումները ճանաչվել են հանցավոր, իսկ MEK-ի ահաբեկիչներին, մասնավորապես, վերջին օրերին Ֆրանսիայի իշխանությունները որոշել են վտարել իրենց երկրի տարածքից: «Մի քանի շաբաթ բողոքողներին առաջնորդում էին հակահեղափոխական ահաբեկչական խմբավորումները, սակայն բախվել էին բնակչության մեծամասնության լուրջ դիմադրությանը»,- շեշտել է նահանգապետը: Խուշանգ Բազվանդը նշել է, որ ահաբեկիչները համակարգում էին հասարակական և մասնավոր ունեցվածքի ոչնչացումը, սակայն նրանց բոլոր ծրագրերը ձախողվեցին: Ըստ պաշտոնյայի խոսքերի՝ նման «բողոքի ակցիաներում» հստակ երևում է օտարերկրյա հետքը և բողոքի բոլոր պատվիրատուները վաղուց հայտնի են:
Խորհրդանշական է այն, որ նոյեմբերի 24-ին իրանական ժողովրդի առջև ելույթ ունեցավ նաև Իրանի ազգային անվտանգության գերագույն խորհրդի (ԱԱԳԽ) նախագահ, փոխծովակալ Ալի Շամխանին: Նա ANA գործակալությանը տված հարցազրույցում հայտարարել է, որ Իրանի ԻՀՊԿ-ը կանխել է ահաբեկչական հարձակումը Իրանի հարավում գտնվող Բուշեհր նահանգի «Էսելույե» գազային հանքավայրի վրա. «Իրանի Իսլամական Հանրապետության թշնամիների կողմից պլանավորված հարձակումը «Էսելյուե» իրանական հանքավայրում խափանվել է: Հնարավոր է, որ չարագործները ձգտում են վրեժ լուծել այն բանի համար, ինչ արել է «Անսարուլլահ» եմենյան շարժումը՝ հարձակվելով սաուդյան թիրախների վրա, բայց թշնամին ձախողվել է»: Շամխանիի խոսքերով՝ այս ամենը օտարերկրյա հատուկ ծառայությունների հետ կապված անձանց ձեռքի գործն էր: Փոխծովակալից մեկ օր առաջ Իրանի կառավարության պաշտոնական ներկայացուցիչ Ալի Ռաբիին կառավարության նիստի շրջանակներում հայտարարել է «Էսելույե» նավթատարի օբյեկտները խարխլելու հարձակվողների ջանքերի և Շիրազում ու ԻԻՀ մի շարք ռազմական կենտրոններում հաղորդակցման համակարգերի վրա հարձակման պլանավորման մասին, գրում է ANA գործակալությունը:
Իրանի ԱԳՆ պաշտոնական ներկայացուցիչ Սեյեդ Աբբաս Մուսավին նոյեմբերի 25-ին մամուլի ասուլիսի ժամանակ՝ Իրանի «Press TV» անգլալեզու հեռուստաալիքի եթերում հայտարարել է, որ «աջակցությունը ցույցերին, որը ցուցաբերում են այլ երկրների ներկայացուցիչները, միջամտություն է Իրանի ներքին գործերին»: Նա նշել է, որ որոշ երկրներ, զարմանալիորեն, աջակցել են ապստամբներին: Մարդիկ իրավունք ունեն խաղաղ ցույցերին մասնակցել, սակայն անկարգություններին մասնակցում էին նաև «ահաբեկչական ուժերը», ավելացրել է դիվանագետը: Իսկ Իրանի Սահմանադրության պահապանների խորհրդի պաշտոնական ներկայացուցիչ Աբբասալի Կադհոդային հայտարարել է, որ Եվրոպայից և Ամերիկայից բողոքողներին ցուցաբերվող աջակցությունը պետք է ճնշվի միջազգային դատարանի կողմից, հայտնում է իրանական Mehr News գործակալությունը: Պաշտոնյան կոչ է արել Իրանի իշխանություններին՝ դատի տալ ԵՄ-ին և ԱՄՆ-ին՝ «հասարակական և մասնավոր սեփականության ոչնչացումը, հրազենով մարդկանց սպանելը և Իրանում քաոսի ստեղծման սատարելու համար»: Նա նաև բարձր է գնահատել Լոնդոնում Իրանի դեսպան Համիդ Բաեդինեջադի արած հայտարարությունները Արևմուտքում հակաիրանական քարոզչական լրատվամիջոցների դեմ, որոնք աջակցում էին Իրանում տեղի ունեցող անկարգություններին: Դատական իշխանությունները խոստացել են, որ յուրաքանչյուր ձերբակալված անձի մեղքը կուսումնասիրվի, և որ բոլորը կստանան կատարված հանցագործության համաչափ՝ համապատասխան պատիժ:
Ի դեպ, ոչ Հայաստանում, ոչ Արևմուտքում չեն գրում, որ նոյեմբերի 22-ին և 25-ին Իրանում տեղի են ունեցել զանգվածային ցույցեր, հանրահավաքներ և երթեր՝ ի պաշտպանություն երկրում կայունության և անվտանգության: Քաղաքացիները համերաշխություն և աջակցություն են հայտնել Իսլամական Հանրապետության Կառավարությանը, ինչպես նաև բողոքել են հակակառավարական ցույցերի դեմ, որոնց հետևանքն են դարձել վանդալիզմի և պետական ունեցվածքի ոչնչացման գործողությունները:
Սերգեյ Շաքարյանց
