Իրանը նախազգուշացնում է տարածաշրջանի երկրներին և իր թշնամիներին
Նոյեմբերի 14-ը կարող է մեր տարածաշրջանի պատմության մեջ մտնել որպես մի օր, երբ Իրանի բարձրագույն ռազմական ղեկավարությունը վերջնագիր է ներկայացրել ԱՄՆ և այն երկրների ամբողջ ռազմական կառույցին, որոնք դեռ մոտ են կանգնած Միացյալ Նահանգներին: Իրանի զինված ուժերի ցամաքային զորքերի հրամանատար, գեներալ-մայոր (բրիգադի գեներալ) Աբդոլրահիմ Մուսավին հայտարարել է, որ ժամանակն է տարածաշրջանից վտարել թշնամական օտար տերությունները, քանի որ նրանց ներկայությունը խռովություն և քաոս է առաջացնում: «Հորմուզի նեղուցի և Պարսից ծոցի տարածաշրջանում անվտանգությունը հնարավոր է ապահովել միայն տարածաշրջանային պետությունների համագործակցության միջոցով»,- նշել է գեներալը, հայտնում է իրանական «Fars News» գործակալությունը:
Աբդոլրահիմ Մուսավիի կարծիքով՝ Մերձավոր Արևելքն ու մյուս տարածաշրջանները պետք է ունենան համընդհանուր անվտանգության համակարգ, ոչ թե լոկալ շահերի կոալիցիաներ. «Մեզ անհրաժեշտ է միջտարածաշրջանային անվտանգություն, ոչ թե կեղծ կոալիցիաներ: Ժամանակն է տարածաշրջանից արտաքսել օտար ուժերին: Վերջին տարիների իրադարձությունները ցույց տվեցին, որ օտար տերությունները չեն կարող հուսալի լինել տարածաշրջանի երկրների համար»: Բրիգադի գեներալը Արևմուտքին մեղադրում էր Միջին Արևելքի ներքին սպառնալիքների դեմ պայքարի միասնական ճակատի ստեղծմանը խոչընդոտելու մեջ և իսլամական աշխարհը մասնատելու փորձերի մեջ: Իրանի ցամաքային զորքերի հրամանատարի խոսքերով՝ Իսլամական հանրապետությունը ձեռք է բերել անկախություն՝ սպառազինությունների և զինտեխնիկայի զարգացման ոլորտում: «Իրանը հաղթանակած դուրս կգա ցանկացած ապագա հակամարտությունից»,- նախազգուշացրել է բրիգադի գեներալ Աբոլրահիմ Մուսավին:
Մենք ուշադրություն ենք հրավիրում այն փաստին, որ գեներալ-մայոր Մուսավին այդ հայտարարություններն արել է այն բանից հետո, երբ նոյեմբերի 13-ին Իրանի ազգային անվտանգության Գերագույն խորհրդի (ԱԱԳԽ) քարտուղար, նախկին Պաշտպանության նախարար փոխծովակալ Ալի Շամխանին, Թեհրանում ԻՀՊԿ հետախուզական ծառայությունների խորհրդաժողովում, հայտարարել է․ «Իսլամական հեղափոխության զանգվածներ մոբիլիզացնելու ունակությունը հանգեցրել է ոչ միայն նրան, որ «Իսլամական պետություն» [ԻՊ] ստեղծելու և օգտագործելու ԱՄՆ-ի ռազմավարությունը լիովին ձախողվեց, այլև անակնկալի բերեց Վաշինգտոնին»: Փոխծովակալ Շամխանին բացատրել է, որ «վերջին չորս տասնամյակների ընթացքում ներքին կայունությունը, ազգային պաշտպանության ներուժը, ռազմավարական խորությունը և նոր ու միջուկային տեխնոլոգիաների առաջընթացը մեծացրել են Իրանի դերն ու ազդեցությունը տարածաշրջանային և համաշխարհային հավասարումների մեջ»: Նա նաև ողջունել է ԻՀՊԿ- ի հետախուզական ուժերին՝ թշնամու դավադրությունները չեզոքացնելու իրենց նվաճումների համար:
Մենք արդեն գրել էինք, որ Իրանը մի երկիր է, որտեղ խոսքը գործ է. նախազգուշացրել է, որ աստիճանաբար կվերականգնի միջուկային ծրագիրը, եթե Արևմուտքը չսկսի կատարել իր պարտականությունները, և իրանցիները արդեն իսկ իրատեսորեն ցույց են տալիս, որ այս գործընթացը նոր թափ է ստանում: Փոխծովակալ Շամխանիի և բրիգադի գեներալ Մուսավիի հայտարարությունները ավելի են ամրապնդում այն համոզմունքը, որ Իրանն իր դիվանագիտական ջանքերով մտնում է նոր գործառնական տարածք: Միևնույն ժամանակ Թեհրանը նախազգուշացնում է իր թշնամիներին, որ Իրանի դեմ ցանկացած ռազմական քայլ ագրեսորների համար աղետի կվերածվի: Աշխարհը պետք է հասկանա, որ Իրանի զինված ուժերն ու հետախուզությունը նոր սպառնալիքներին և մարտահրավերներին պատրաստ են ավելի քան 100%: Շամխանին և Մուսավին բարձրաձայնել են միայն Գերագույն հրամանատարի կարգադրության դրույթները, այն էլ` ոչ ամենակարևորները: Ինչպես ասում են, Աստված մի արասցե, որ պատերազմ լինի։ Իրանական երկու բարձրագույն սպաների վկայությունները բավարար հիմք են տալիս, որ հավատալու իրանական բանակի և նավատորմի ունակություններին և հնարավորություններին՝ պատերազմ պարտադրել պոտենցիալ թշնամիներին այն պայմաններում, որոնք ի սկզբանե ձեռնտու են Իրանին: Իրանի հարևաններին մնում է մեկ բան՝ սովորել ճիշտ եզրակացություններ անել Թեհրանի նախազգուշացումներից:
Սերգեյ Շաքարյանց
