Փարիզի կենտրոնում հզոր պայթյունից կան տուժածներ
BFMTV հեռուստաալիքի տեղեկացմամբ, Փարիզի իններորդ շրջանում գտնվող հացի փռի պայթյունը տեղի է ունեցել գազի արտահոսքի հետևանքով։
Վերջին տվյալների համաձայն, պայթյունից տուժել է 22 մարդ։ Տեղում աշխատում են փրկարար ծառայությունները։
Պայթյունը տեղի է ունեցել այսօր տեղի ժամանակով մոտ 9։00-ին, Փարիզի Տրևիզ և Սենտ Սեսիլ փողոցների խաչմերուկում գտնվող շենքի առաջին գործող հացի փռում, ինչին հետևել է հրդեհի բռնկումը։ Կոտրվել են հարևան շենքերի ապակիները։
Ոստիկանությունը «Twitter»-ում հրապարակված հաղորդագրությամբ քաղաքացիներին խնդրել է շրջանցել տարածքը և չփակել փրկարար ծառայությունների մեքենաների ճանապարհը։
Հեռուստաալիքը նշել է, որ արտակարգ դեպքը որևէ կերպ կապված չէ «դեղին ժիլետների» բողոքի ակցիաների հետ, որոնց անցկացումը նախատեսված է այսօր Ֆրանսիայի մայրաքաղաքում։ Դեպքի վայր են ժամանել Ֆրանսիայի վարչապետ Էդուար Ֆիլիպը և ներքին գործերի նախարար Քրիստոֆ Կաստանյերը, ինչպես նաև քաղաքագլուխ Անն Իդալգոն։
