ՍԴ-ն որոշել է, որ գրավը պետք է լինի լիարժեքորեն ինքնուրույն խափանման միջոց

«Երեկ Սահմանադրական դատարանը հրապարակել է ՍԴՈ-1480 անչափ կարևոր որոշումը, որի հիման վրա վերջապես կարող է լուծում ստանալ տարիներ ի վեր գիտական, փորձագիտական և իրավակիրառական հարթություններում բարձրաձայնվող մի կարևոր խնդիր՝ կապված այլընտրանքային խափանման միջոցների և մասնավորապես գրավի արդյունավետության հետ,- գրել է Ռուբեն Մելիքյանը։- Դատավոր Ալվինա Գյուլումյանի նախագահությամբ՝ Սահմանադրական դատարանը որոշել է, որ գրավը պետք է լիարժեքորեն ինքնուրույն խափանման միջոց լինի, այլ ոչ թե կապակցվի կալանքին։ Նաև որոշել է, որ գրավը չպետք է ուղղված լինի միայն մեղադրյալի փախուստը կանխելուն, այլև պատշաճ վարքագիծն ապահովելուն (օրինակ՝ վկաների վրա ներազդեցությունը կանխելուն)։

ՍԴ-ին ուղղված դիմումի հեղինակը Վճռաբեկ դատարանն էր, և ուրախալի է, որ հարցի վերաբերյալ ՍԴ-ին դիրքորոշումներ են ներկայացրել ոչ միայն պատասխանողը՝ Ազգային ժողովը, այլև Կառավարությունը, Մարդու իրավունքների պաշտպանը և Փաստաբանների պալատը։

Իրավակարգավորման բաց չառաջացնելու նկատառումով՝ Սահմանադրական դատարանն Ազգային ժողովին ժամանակ է տվել՝ մինչև 2020թ. ապրիլի 15-ը, Քրեական դատավարության օրենսգրքում համապատասխան փոփոխություններ կատարելու համար»։

ՍԴ որոշման հղումը՝ ստորև։